Tusagassiuutit: Russit Kalaallit Nunaanni sinniisoqarfimmik ammaarusuttut
Russit nunanut allanut tunngasunut ministeriata oqaasii pillugu iliuuseqartoqassappat Nuummi nunamit allamit sinniisoqarfissamik ujaasisoqaqqissaaq.
Rusland Kalaallit Nunaanni sinniisoqarfeqarusuttoq Lavrovip Moskvami tusagassiortunik katersortitsinermi oqaatigaa. DR aamma Politiken taama allaaserisaqarput.
AAMMA ATUARUK Assit takukkit: Amerikamiut sinniisoqarfiata erfasoq Nuummi amugaa
Taama nalunaaruteqarnera danskit nunanut allanut tunngasunut ministeriannik, Jeppe Kofodimik ataatsimeeqateqarnerup kingorna pivoq –Sergei Lavrovip oqarnera naapertorlugu ataatsimiinneq kissaateqarnerminnik akuersaarpaluttumik nipeqarsimavoq. Tamannali suli uppernarsarneqanngilaq.
Naalakkersuisut Ruslandip kissaateqarneranut atatillugu aamma nalunaaruteqanngillat.
USA Nuummi Issittumi Sakkutooqarfiup illorsuani inimi sinniisoqarfimmik ukioq manna juunimi ammaavoq.
USA Ruslandilu nunap politikkikkut inissisimanerani ilaatigut imaatigut aqqutissaqarnissami, ilisimatusarnermi Issittumilu aatsitassarsiornermi niuernermilu pitsaanerpaamik atugassaqarniuupput.
Pissaanilissuit Kina ilanngullugu sumiiffimmi nakkutilliiniarlutik sakkutooqarnikkut aamma unammipput.