Uummannarmiut ilaqutariit: Nukissiorfimmiit imeq atoqqinnianngilarput
Imermik kuutitsiinnarluni nillarissumik imerneq, uffarneq errorsinerluunniit tamakku inuppassuit maanna ulluinnarsiutigaat. Uummannamili ulluni 20-ni tamanna nalinginnaasimanngilaq.
Taamaattumik ilaqutariit Malakiassennikkut ilaqutariit allat peqatigalugit imermik imeqarfimmiit imeqqinngisaannassallutik aalajangerput.
- Imeq uuliamik akoqarsimasoq tusaraatsigu, tassanili tusaannarlugu aalajangiupparput imeqqinngisaannassallutigu, Dorthe Katrine Malakiassen oqarpoq.
AAMMA ATUARUK Uummannaq: Imeq avataaneersoq mingoqarsimasoq
Maannalu imermik Danmarkimeersumit ukiup tulliani umiarsuaqaqqinnissaanut tikisitsilerput.
- Aalajangersimavugut Danmarkimut bestiiliiniarluta umiarsuaq kingulleq tikinnginnerani tikittussanik. Taava naatsorsorsimavagut umiarsuaqaqqittalernissaata tungaanut cirkarlugit, Dorthe Katrine Malakiassen oqarpoq.
Imeqarfillu maanna uuliamik akoqarunnaartoq Nukissiorfiup ippassaq nalunaarutigaa, taamaattumik tankersuarnik imillit pajuttorneqartarnerat naliginnanngoqqilerpoq. Ilaqutariillu meeqqatik illersorniarlugit imermik pisiniarfimmi pisiamik taquartittarniarpaat.
- Meeqqeriviup ruujorii ataannartuummata imeqarfimmut. Taava taarsersorniarneqanngimmata uuliarlu tassaneereernikoq uagut meeqqavut illersorniarlugit peqqinnanngimmat aalajangersimavugut imermik pisiamik nassarlutik meeqqerivimmukartassasut, Dorthe Katrine Malakiassen oqapoq.
Ullut ingerlaneranni Uummannami suliffeqarfiit pingaarnerpaat imermik pajuttorneqartarput. Dorthe Katrine Malakiassen timelæriuvoq saniatigullu angerlarsimaffimmini GUX-imi ilinniarluni, naammagittakatalluinnarporlu.
- Nuannaarluni itertarneq annikilliartorpoq. Suliartoraanni iluamik errortorsinnaanani anartarfimmeereersimalluni. Vådserviettinik errortoriarluni bakteriaajartarneq, imerlu atoriaanaanagu, soorlu suliffiup iluani, Dorthe Malakiassen oqarpoq.
Paarnannguaq Mørchip angajoqqaami imiat tipeqanngimmat angajoqqaaminut ulloq ataaseq allortarlugu uffariartarpoq. Angerlarsimaffannimi imeq kloriinisunnippoq. Naak angajoqqaamini uffartaraluarluni erngup mingutsissimanera malunniutilersoq oqaatigaa.
"Timinnut malunniulluppoq"
- Tassa uagut uffartuaanangajappugut, kisiat timimut malunniulluppoq. Ungillerineq niaqqukkut, taavalu uanga assorujuk ungillerisaarpunga, Paarnannguaq Mørch oqarpoq.
AAMMA ATUARUK Uummannarmiunut nutaarsiassatsialak: Imeq imeqarfimmeersoq imerneqarsinnaalerpoq
Ilaqutariit Malakiassenikkut ulluinnarni timersortuupput, taamaattumik annertunersumik imermik pisariaqartitsisuullutik. Ilaqutarillu tankersuarnik imeqaramik naliginnaasumik imeqaqqileriaannaapput. Imeqarfimmiilli imeq iganermut atortalerumaarneraat apeqqutigigakku ima Dorthe Katrine Malakiassen akivoq:
- Pittaalluinnarpat, paasissutissanik peqqikkutta aalajangernerput takkukkumaarpoq. Massakkut akisinnaanngilara taanna apeqqut. Imeq apeqqutaavoq qanoq pitsaatiginersoq.
Nukissiorfiit ilaatigut ima allapput:
- Ilaasa misigisimavaat erngup kuuffianit uuliasunnittoqartartoq. Nukissiorfinnit akissutigineqarpoq taamaattoqartillugu imeq tipaarunnissaata tungaanut kuutsinneqassasoq. Tamanna iluaqutaanngippat taava Nukissiorfinnut saaffiginnittoqassaaq alakkaasoqarumaarporlu.
