Future Greenlandimi ataatsimeersuartut ulloqeqqasiornerini akerliussutsimik takutitsisoqartoq

Jan Joe Seidsen aamma Angerlannguaq Kaj Thorleifsen Futere Greenlandip Katuami ataatsimeersuartitsinerani  ulloqeqqanut nerinermi akerliussutsimik igalaakkut takutitsipput.

- Tusaaqqulluta taamaaliorpugut - siusinnerusumiit suaartarnerulluta. Tasiilami pisut pillugit, sumi tamaani pisut pillugit. Aningaasat qanoq atornissaannut kukkusumik pingaarnersiuineq pillugu, Jan Joe Seidsen oqarpoq.

Arlaannannulluunniit attuumassuteqaratik akerliussutsimik takutitsillutik taanna oqarpoq.

Inuit 400-t missaanniittut aningaasaqarnikkut kiffaanngissuseqarneq politikkikkullu namminersorneq qulequtaralugu ataatsimeersuartut ullup qeqqanut nereqatigiipput. 

AAMMA ATUARUK Kommuneqarfik Sermersooq Tasiilami pissutsit pillugit nassueruteqartoq

Akerliussutsimik takutitsisut sigguutik nipittartulersimavaat, KNR-miillu apersorusumagatsigit akerusunngeqqaaraluarput. Aatsaalli ataatsimeersuartut ulloqeqqanut nereqatigeereermata nipittartut sigguminniit peerpaat, aatsaallu sooq akerliussutsimik takutitsinerminnik oqaaseqarlutik.

- Future Greenland Katuami eqqartorneqassappat, siunissarput eqqartorneqartariaqaraluarpoq. Meeqqat siunissaat. Nunatsinni najugallit siunissaat, Jan Joe Seidsen oqarpoq.

- Tasiilamiinnaanngitsoq nunarpulli tamakkerlugu ajornartorsiutit qitiviat aaqqiivigineqanngippat, ingerlariaqqinnavianngilagut. Pisuussut, ingerlariaqqissutigisassarput peqqinngippat toqqiganilu, taava suna tamarmi ajalusuussaaq. 

Tasiilami meeqqat inuusuttullu inuuniarnermikkut ajornartorsiortut pillugit DR-ip piviusulersaarutaat aallakaatinneqareersorlu annertuumik oqallisigineqalerput, akerliussutsimillu takititsisut naammaginnigatik iliuuseqarput.

- Matumunnga ukkassineq naammalersinnaanngilaq. Ajornartorsiutit iluarsiniarlugit suliassat allat suulluunnit unitsinneqartariaqarput, Jan Joe Seidsen naggasiivoq.

AAMMA ATUARUK Tasiilaq: Atsiornernik katersisoqaraluartoq isumaginninnikkut siuariartoqanngitsoq