Aaja taasisut ikitsut tunuliaqutarigai

Aaja Chemnitz Larsen Aleqa Hammond peqatigalugu folketingimukassaaq, qinersereernerullu kingunitsianngua KNR-miit Inuit Ataqatigiinneersoq tuppalleqqaqisoq oqaluupparput:

- Ilumoortumik oqassaguma eqqumeeqaaq. Tulluusimaarnaqaaq annertuumillu akisussaaffiliivoq. Taamak annertutigisumik tapersersorneqarnera tuppallernareqaara, Aaja Chemnitz Larsen oqarpoq.

Aamma atuaruk IA Siumullu qinersisartut avikkaat

Aaja Chemnitz Larsen 2450-nit qinerneqarpoq, Johan Lund Olsenimiillu 156-nik amerlanerussuteqarluni. Unnuullu ingerlanerani Nuummi taasinerit kisinneqanngitsut suli Johan Lund Olsenimit Múte Bourup Egedemillu qinersisai ikinnerugaluarput.

- Eqqisisimasumik ingerlavoq. Piffissap ilaani takusinnaavara unamminartoq tassani eqqarsaatigalugu, Mute Johanilu qinerneqarluarnissaat erserami, aammami taamatut pisoqarpoq. Taamaattumik qinersisut ikitsuinnaat apeqqutaasimapput, Aaja Chemnitz Larsen oqarpoq.

Ministeriunermik aalajangiissaluni nuannerunartikkaluaraa

Maannalu Københavniliarnissaq tullernguuppoq, tassanilu ulloq siullermiit sulineq aallartissaaq. Ilaasortanngorlaallu oqaluttuaraa suleqatigiilernissat anguniassallugit  kalaallit nunaannullu pitsaanerpaaq anguniassallugu.

Taamaakkaluartoq kina danmarkimi ministeriuninngussanersoq kalaallit nunaannit ilaasortaalersut aalajangissaanngilaat. Aaja Chemnitz Larsenillu aalajangiisuusussaanngikkaluarluni sunniuteqarnissani suli upperaa:

- Pissanganassagaluaqaaq, sunniuteqarnissamullu periarfissaasussaagaluarluni, kisianni inissisimaneq maanna takoreerparput taamaattumik tassanngaanniit sulineq aallartissaaq.