IA Siumullu qinersisartut avikkaat

Erngerluta Siumumit IA-miillu Folketingimi ilaasortaatitaqalerpugut. Tamatuumuuna Naalakkersuisut siulittaasorisimasaat Aleqa Hammond Siumumeersoq aamma Meeqqanullu Illersuisuunikoq Aaja Chemnitz Larsen IA-meersoq Christiansborgimukartussanngorput.

Aleqa taaneqangaatsiartoq

Aleqa Hammondimut qineqqusaarneq oqitsuinnaanikuunngilaq. Taannami qinigassanngortippoq Nunatta Karsianik atornerluisimasutut ilisimaneqarluni, kinguninngualu atornerluisimanera marloriaammik annertunerusoq paasineqarluni. Aamma parteeqatiminit toqqaannartumik unammillerneqarpoq qineqqusaaqatai Aleqa Hammondimut sanilliullutik tatiginarnertut imminnut saqqummiukkamik.

Qinersisartulli Aleqa qimanngilaat, taannalu taagorneqarnerpaalluni, 3.745-nik taaneqarami. Tassa qinersiartortut 18,3 procentiisa taasimavaat.

IA-p iluani unammineq

Aaja Chemnitz Larsenip unammillertai annerpaat partiianinngaanneerput. Taanna 2.540-nik taaneqarpoq, Johan Lund Olsen 2.344-nik taaneqartoq kiisalu Múte B. Egede 2.121-nik taaneqarluni.

Qinersisinnaasut amerlasuut sisamanngornermi qinersisoqarmat taasiartunngillat, tassa taasisinnaasut 50 procentiinnai taasiartorsimagamik.
Demokraatit 8,5 procentinik taaneqarput, Atassut 7,4 procentinik taaneqarluni kiisalu Partii Naleraq 4,7 procentinik taaneqarluni.