Nunarsuaq tamakkerlugu arnanik persuttaasarneq akiorniarlugu ullorititaq: Naalakkersuisup persuttaaneq eqqartorneqartikkusuppaa

Arnanut persuttaasarneq digitaliusumut ikaarsaarsimavoq, taama oqarpoq naligiisitaanermut naalakkersuisoq Naaja H. Nathanielsen.

Nunatsinni arnat amerlavallaartut, persuttaanermik ilaqartumik inuuneqartut amerlavallaarput. Peqqissutsimut naalakkersuisoq Naaja H. Nathanielsen, IA-meersoq, tusagassiuutinut nalunaarummi, FN-ip nunarsuaq tamakkerlugu arnanik persuttaasarneq akiorniarlugu ullorititaanut atatillugu, taama naalakkersuisoq allagaqarpoq.

Persuttaaneq, timikkut persuttaanerinnaaneq ajorpoq. Naalakkersuisup allagaqarnera naapertorlugu, inuit nittartakkanitigut naapittarfianni, digitaliusumik persuttaaneq immikkut maluginiarneqartariaqarpoq.

-Malersuinerit, sioorasaarinerit pinngitsaaliillunilu iliuuseqartitsinerit persuttaanerup, arnanut niviarsiaqqanullu qanoq siammasitsiginera takuneqarsinnaavoq. Pingaartumik nittartakkatigut inuit naapittarfii ulluinnarni atorneqalernikuummata, taama allappoq Naaja H. Nathanielsen.

Persuttaaneq ukkatarineqalerli

Ilanngullugulu Naalakkersuisup allakaagaa naapertorlugu, aningaasaqarnikkut naligiinnginneq nipaatsumik atornerluinerusinnaavoq periarfissanik killiliisoq, persuttaasumillu pinngitsuuisinnaannginnermik attassisoq.

Taamaattumik naalakkersuisoq isumaqarpoq, aningaasaqarnikkut naligiisitaaneq ukkatarineqartunut ilaasariaqartoq.

-Persuttaasarneq aporfeqanngilaq taamaammallu aatsaat naapilluni pisartuunani.

-Taamaammat persuttaasarneq oqaloqatigiissutigiuartariaqarparput, tikkuartorlugu, pinaveersimatillugu, akuersaarnagu, persuttaanerullu ikit pilersitaasa mamitinnissaat periarfissillugu.

Politiit nakuusertoqarsimaneranik kisitsisaataat 2022-meersoq naapertorlugu, nakuusertoqarsimaneranik 1090-inik nalunaaruteqartoqarsimavoq, angerlarsimaffimmilu eqqissiviilliornerit 2.500-t nalunaarutigineqarsimallutik.

Arnat qanoq amerlatigisut persuttagaasarnersut oqaatigineqarsinnaanngilaq, persuttaasoqartillugu kina kimullu persuttaasoqarsimanersoq allassimaneq ajormat.

Naligiisitaanermut siunnersuisoqatigiinni siulittaasoq, Kathrine Bødker, naapertorlugu arnanut persuttaaneq ajornartorsiut annertuujuvoq. Qimannguiviit qanoq atorneqartiginersut qiviaranni, tamanna ersarimmat, siusinnersukkut KNR-imi allaaserineqartumi taama oqarpoq.