Sulisut Nuuk Imeq A/S-ip ammaannarnissaa nuannaarutigaat
Nuuk Imeq A/S siunissami ammaannassaaq, siulersuisut aggustip naanerani nalunaarumminni taama allapput.
Suliffeqarfik matussasoq siulersuisut upernaaq innersuussuteqaraluarput.
Taamaammat aalajangerneq nutaaq Nuuk Imeq A/S-imi sulisunut nuannaajallannartuusoq, sulisup Nuka Enoksenip oqaatigaa:
- Nuannaajallannartorujussuuvoq, kissaammernarlunilu. Neriuuteqarnartorujussuuvoq.
Puiaasanik maannakkutut utertitsisarneq unitsinneqassasoq, qillertuusanillu atuilernissaq aallartinneqassasoq Naalakkersuisut upernaaq isumaliuuteqarput.
AAMMA ATUARUK Nuuk Imeq matunissaminnik tunuarteripput
Taamaammat Nuuk Imeq A/S-imi siulersuisut suliffeqarfiup 2018-ip naanerani matuneqarnissaa innersuussutigigaluarpaat.
Nuuk Imeq A/S-imi sulisut piffissami sivisuumi suliffeqarfitsik pillugu nalornisitaasimasut, suliffeqarfiup septembarip aallaqqaataani ataannarnissaanik ilisimatinneqarput.
-Siunissaq suli nalorninartoqaraluartoq siulersuisut aalajangerput aningaasaliissuteqarnissanik nutaanik misissuineq pilersaarusiornerlu nanginneqassasut, tamakku suliffeqarfiup siunissami isumannaatsumik ingerlaannarnissaanut pisariaqartinneqarmata, pisortaaneq Bernhard Christensen tusagassiutinut nalunaarummini allappoq.
Nuuk Imeq A/S aasaq juunimi nutaamik siulersuisortaarpoq, Naalakkersuisuni siulittaasuusimasoq Kuupik Kleist siulersuisuni siulittaasunngorluni.
AAMMA ATUARUK Nuuk Imeq sinneqartooruteqangaatsiartoq
Nuka Enoksenip, Nuuk Imeq A/S-imi ukiut arfinilissaanni sulisup, suliffeqarfimmi ukiut amerlanerni suliinnarnissani neriuutigaa.
- Siunissaq takorloorlugu toqqissisimanartorujussuuvoq. Aqagumiit aqagumut imaluunniit qaammatip tullianut qanoq iliussaagut, tamakku eqqarsaataajunnaarput, Nuka Enoksen taama oqarpoq.
Nuuk Imeq A/S 42-runik sulisoqarpoq.
AAMMA ATUARUK Nuuk Imeq A/S-ip matuneqarnissaa innersuussutigineqartoq
