Nuuk Imeq matunissaminnik tunuarteripput

Siulersuisut Nuummi tunisassiornerup januaarip naanerani matuneqarnissaa siornatigut inassutigigaluarpaat, puiaasanik utertitsisarnermut aaqqissuussinermik nutaamik, qillertuusanik atuilernissamik aamma imaqartumik, Namminersorlutik Oqartussat isumaliuteqarnerat pissutigalugu.

Ingerlatseqatigiiffiulli siulersuisui maanna sakkortuumik oqalukkunnaarput:

- Siunissaq suli nalorninartortaqaraluartoq siulersuisut aalajangerput aningaasaliissuteqarnissanik nutaanik misissuineq pilersaarusiornerlu nanginneqassasut, tamakku suliffeqarfiup siunissami isumannaatsumik ingerlaannarnissaanut pisariaqartinneqarmata, ingerlatseqatigiiffik tusagassiorfinnut nalunaaruteqarluni taama allappoq.

AAMMA ATUARUK Nuuk Imeq sinneqartooruteqangaatsiartoq

Nuuk Imermi sulisut siulersuisut aalajangernerat pillugu ilisimatinneqareerput, ataatsimoortumillu ima oqaaseqaateqarfigaat:

- Siulersuisut anguniagaqarpalaarnerullutik piviusorsiortumillu periuseqarlutik suliniarnerat, suliffitsinni qiimalluni sulineq utertissavaa, nalunaarummi taama allassimavoq.

AAMMA ATUARUK Nuuk Imeq A/S-ip matuneqarnissaa innersuussutigineqartoq

AAMMA ATUARUK Namminersorlutik Oqartussat Nuuk Imermut tunngatillugu akisussaasuupput

Suliffeqarfik 2016-imi akileraarutit ilanngaatigereerlugit 30,3 millionit koruuninik sinneqartooruteqarpoq, aamma piginnittut iluanaaruteqarluarput, iluanaarutisiassatut 52 millionit koruunit siunnersuutigineqarmata.

Nuuk Imeq Kommuneqarfik Sermersuumit, Royal Unibrewimit Carlsberg Breweriesimillu pigineqarpoq.