Assi: KNR

ARAJUTSIVIGIT? Sapaatip akunnerani nutaarsiassat pingaarnerit

Sapaatip akunnerani matumani nutaarsiassat kommunalpolitikkimut pinerlunnermullu tunngasut arlaqarput.

Sisimiuni ujajaasoqarsimaneranut atatillugu Qeqqata politiivisa angutit ujajaasimasut nassaarerusullugit innuttaasunit ikoqqupput. Ujajaasut taxartitsisartoq toqunniarlugu sioorasaarsimavaat 4.000 koruuninillu tilliffigisimallugu.

Greenland Ventures Hudson Resourcesimut millionerpassuarnik aningaasaliisimanera aningaasaliisartunit nunanit allaneersunit pitsaasutut maluginiarneqassasoq ataasinngormat KNR-imi oqaluttuaraarput.  

Kommuneqarfik Sermersuumi borgmesterip nakkutilliisuutitanut misissuiffigeqquneqarnera ataasinngornermi nutaarsiassat annerit ilagaat.

Siumup kommunalbestyrelsimut ilaasortaatitaasa marluk Siorarsiorfimmut tunngatillugu borgmesterip misissuiffigineqarnissaa kissaatigaat. Siorarsiorfik partiinit tamanit taperserneqarnikuugaluartoq, maanna taamaakkunnaarpoq.

Inuusuttut 15-24-nik ukiullik sakialluummik eqqugaakkajunnerunerat ernummatigineqartoq, merlunngormat oqaluttuaraarput.

Taavalu nutaarsiassaq nuannernerusoq. Aalisarnerup iluani siuariartortoqarpoq. Aalisakkat tulaanneqartartut amerliartortut Naatsorsueqqissaartarfiup nalunaarutigaa.

Politikkerit kommunini qineqqusaaraangamik nukippassuit atortarpaat. Taamaakkaluartoq kommuninut qinersinerni Inatsisartunut qinersinernut sanilliullugit qinersisut ikinnerusarput. Kommuninulli qinersineq innuttaasunut sunniuteqartartoq Asii Chemnitz Narupip (IA) Martha Lund Olsenillu (S) oqaatigaat.

Pisortat suliffeqarfiutai kommuninut allanut nuunneqarnissaat kommunit kissaatigaat. Tamannali akisusinnaavoq. atorfiit 600-t nuunneqassappata milliardip affaanik akeqarsinnaasut BDO-naatsorsorsimagaa KNR pingasunngormat oqaluttuaraarput.

Kommunalbestyrelsinut ilaasortanngorniuunneq sukaruttortoq nunaqarfinni aqutsisut kommunal politikkimi sunniuteqaqataanerunissamik kissaateqarnerat oqaatigineqarpoq.

Suut tamaasali kommunimut tunnganngillat. Anders Stenbakken KNI-mi ussassaarinermut pisortanngulersoq sisamanngormat oqaluttuaraarput. Aggustip aallaqqaataani KNI-mi sulilissaaq.

Angut kalaaleq, Birna Brjánsdótturimut toqutsisimasutut pasineqartoq, Islandimi pisortatigoortumik toqutsisutut pingasunngormat unnerluussaavoq.

Oqaluttuat pinerlunnermut tunngasut ajoraluartumik sisamanngormat initupput. Angut 34-nik ukiulik toqutseriarsimasutut killiligaanngitsumik pineqaatissinneqarsimasunut inissiisarfimmiittussanngorlugu pineqaatissinneqarsimanera sisamanngormat oqaluttuaraarput.

Oqaluttuarli pinerlunnermut tunngasoq kingulleq nuannernerulaarpoq. Innuttaasut marluk angummik atisanik nassataqarluni aqqusinikkut pisuttumik naammattuuisimapput. Atisallu tillitaaneranik pasitsakkamik angut uanitsissimavaat tillinniarsimaneranillu nassuertillugu. Kingorna tillinniaq politiinit tigusarineqarpoq.

Aalisarnermut naalakkersuisoq SIK GE-lu aalasakkanik pisassiissutit pillugit sorsunnertik sapaatip akunnerani qaangiutilersumi nageqqippaat. Uanilu eqikkarneqarnera takuneqarsinaavoq.

Kommuninut qinersisoqareerpat Qaasuitsup Kommuniata avinneqarnissaa sulissutigineqalissaaq. Avinneqarpallu aningaasaqarnerat qanoq isikkoqalissanersoq uani takutipparput:

Qujanaq sapaatip akunnerani matumani allaaserisatsinnik atuartaravit

Isummersuutit