Angut kalaaleq Birnamut toqutsisutut unnerluutigineqartoq
Angutip tigummigallarneqartup tigummigallagaanera sapaatit akunnerinik marlunnik sivitsorneqassasoq sisamanngornermi eqqartuussisoqarnerani aalajangiunneqarpoq. Unnerluussisussaatitaasup Olafur Thor Haukssonip paasissutissat Visir.is-imut uppernarsarpai.
Angulli pasineqartoq suli pingitsuunerarpoq. Kilisaammili Polar Nanumi inuttaanermini hashimik 20 kilomik eqqusseriaraluarnini nassuerutigaa.
Arnaq Birna Brjánsdóttir 20-nik ukioqartoq, Reykjavikkimi illoqarfissioreerluni tammarmalli angut kalaaleq januaarip 18-ianiit tigummigallarneqalerpoq.
Islandimi nutaarsiassaqartitsiviit naapertorlugit, angut islandimi pillaasarnermi inatsit nr. 211 naapertorlugu unnerluutigineqarpoq. Angut pisuusutut eqqartuunneqassaguni minnerpaamik ukiuni tallimani inuunerulluunniit sinnerani parnaarussaasinnaavoq.
