Lund Madsenip oqaatsitsinnik ilikkagaa siulleq tassaavoq 'usuk'
Kalaallit Nunaata ilaa danskit tusagassiuutaanni nalinginnaasumik sammineqarneq-ajortoq danskinit ilisimasaqarfiginerulernissaa siunertarisimavaa.
- Nuna alianaalluinnartuuvoq siornatigut sunnguamilluunniit ilisimasaqarfigisimanngisara, Anders Lund Madsen KNR-imut taama oqaluttuarpoq.
Anders Lund Madsen arlaleriarluni Nunatsinniissimavoq Tunuli tikissimanngisaannarpaa.
Nukappiaraalluni meeqqat atuarfianni atuartuullunili Tunu tikikkusulersimavaa.
- 5. klassimi atuartuullunga Ammassalimmiumik atuaqatitaarpunga- tassa Tasiilarmiumik - tassanngalu ilikkagatuara tassaavoq usummik oqarnissaq, taavalu soorunami aamma Tunoqartoq paasivara, Madsen oqarpoq.
Aamma atuaruk Anders Lund Madsenip piviusulersaarutaa nuannaartitsivoq
Kalaallit Nunaat pillugu aallakaatitassiornissamut periarfissaqarluni paasigamiuk Nuuk kitaanilu illoqarfiit allat eqqarsaataaniissimannngillat. Danskimmi Kalaallit Nunaata ilaanik danskit tusagassiorfiisa qaqutiguinnaq sammisartagaannik oqaluttuukkusussimavai.
- Taava nunap assinga qimerluulerpara Ittoqqortoormiillu Tunumiittoq takullugu. Taava eqqarsarpunga, allaanngilanga Anders And nunap assingani toorninnguaq qimerloorlugu oqartoq pissanganarpalungaarami, Anders Lund Madsen oqarpoq.
Taamaammat Anders Lund Madsen "Illoqarfiit Avinngarusimanersaannut" pingasunngornerit ilaanni tikikkami sunik naapitaqassalluni ilisimanngilluinnarpaa.
- Taava eqqarsarpunga, shit, ungasissorsuarmiippoq, Madsen oqarpoq.
Ittoqqortoormiilli minngerunngitsumilli innuttai ingerlaannaq nuannarisupilussuanngorpai.
- Sunaaffami nuna nalissaqanngitsuusoq inussiarnersorsuarnillu inoqartoq. Aamma inunnit akuuffigisartakkannit pinertuneroqaat. Misigisaq nuannerluinnarpoq.
Aamma atuaruk ASSIT Anders Lund Madsen Ittoqqortoormiini aallakaatitassiortoq
Taamali avinngarusimatigisumi inuuneq imaannaanngitsuuvoq.
Taamaammat Anders Lund Madsen Ittoqqortoormiinut nuunnissaminut sapiissuseqarnersoq apeqqutaavoq.
- Københavnimi najugaqarpunga, Rigshospitalimut meterinik 170-iinnarnik qanitsigisumi. Tassaniippullu nakorsat Danmarkimi pikkorinnerpaat, aamma najukkannit meterinik 200-nik qanitsigisumiippoq filmertarfik neriniartarfiillu burgeritorfigineqarsinnaasut 60-it missaanniillutik. Pisariaqartitat tamaasa imaaliallaannaq pissarsiarineqarsinnaapput, Anders Lund Madsen Ittoqqortoormiunut nuunnissaminik maannakkorpiaq pilersaaruteqanngitsoq taama oqarpoq.
Nangeqattaartuliami "Illoqarfiit Avinngarusimanersaanni" immikkoortut aappaat DR1-ikkut unnugu nalunaaqutaq 20.30 aallakaatinneqassaaq. Taanna immikkoortullu tullii ugguuna aamma isiginnaarneqarsinnaapput.