Anders Lund Madsenip piviusulersaarutaa nuannaartitsivoq

Tusagassiortup quiasaarisartullu, Anders Lund Madsenip Ittoqqortoormiit pillugit piviusulersaarutaani immikkoortoq siulleq DR-imi ippassaq aallakaatinneqarpoq. Aallakaatitassiarlu Ittoqqortoormiini najugallip, aallakaatitassiamilu peqataasup nuannaarutigaa.

Allattoq Ivik Kristiansen, Paarnaq Hansen

novembarip 20-at 2015 12:24

Danmarkimi tusagassiortup tusaamaneqarluartup Ittoqqortoormiit innuttaasuisa atugarisaat pillugit piviusulersaarutaani Therericie Sanimiuinaq Pedersen peqataavoq. Piviusulersaarullu sisamanik immikkoortortallip immikkoortumi siullermi aallakaatinneqalernerani tv-p saavani pissangalluni issiavoq.

Tassami Anders Lund Madsen quujasaarisartutut ilisimaneqarneruvoq, Ittoqqortoormiinilu immiussinnginnerani innuttaasut paasitinneqarmata, piviusulersaarutip quiasaarutaanissaa Therecie Sanimuinaq Pedersenip ernumassutigisimagaluarpaa.

Aamma atuaruk ASSIT Anders Lund Madsen Ittoqqortoormiini aallakaatitassiortoq

- Taassuma aallakaatitassiarisartagai quiasaarut pisaramik isumaqaraluarpugut aamma maanna taamaassasoq. Kisianni ilumoorsaarniarluni oqarmat tamanna piareersimaffigaarput, Therecie Sanimuinaq Pedersen KNR-imut oqarpoq, ilanngullugulu oqarluni, piviusulersaarut atugarisanik saqqummiussilluartoq, ippassarlu aallakaatinneqartoq nuannaarutigalugu.

Ittoqqortoormiit saqqummiunneqarnera

Ittoqqortoormiit isiginnaartorpassuarnut saqqummiunneqarnera taassuma ingammik nuannaarutigaa.

Tassami Ittoqqortoormiini innuttaasut ilaatigut puigorneqartutut misigisimasartut, oqariartuutaallu tusaaneqarneq ajortut, Therecie Sanimuinaq Pedersenip ersersinniarpaa.

- Neriuppunga taakku aallakaatitassat tamarmik aallakaatinneqareerpata ilumoorsaarnerullutik... Inuinnaagatta assigiinngitsunillu pisariaqartitaqarluta, tusaaneqarnerulissasugut, Therecie Sanimuinaq Pedersen oqarpoq.

Anders Lund Madsenip piviusulersaarutaata immikkoortuata aappaa sisamanngorpat, novembarip 26-ani Nunatsinni nalunaaqutaq 16:30 DR-1-imi aallakaatinneqassaaq.

Aamma atuaruk Ittoqqortoormiit Nunatsinni tamarmik assigiimmik ateqalerpoq