Ittoqqortoormiit Nunatsinni tamarmik assigiimmik ateqalerpoq
Nunatsinni nunat aqqi pillugit oqartussaqarfik Danmarkimit akisussaaffigineqarsimagaluartoq 1984-imi akisussaaffik nunatsinnut nuunneqarpoq, 1989-imilu immikkut inatsisiliuunneqarluni.
Nunatsinni nunat aqqinik katersilluni nalunaarsuineq 2007-mi aallartinneqarpoq, maannalu katersaatigineqartut pingaaruteqarluartut nunat aqqisa taaguutaat, 7.523-nit amerlanerulerlutik. Ullumikkut nunat aqqi akuerisaasut 33.000-init ikinnerunngitsut allattugaatigineqalerput.
Oqaasileriffik tassaavoq nunat aqqinik isumaginniffiusoq, Nunallu Aqqinik Aalajangiisartunut allattoqarfiusoq. Nunat Aqqinik Aalajangiisartut tassaapput nunat aqqinik pisortatigoortumik atuuttussanngortitsisartut.
Oqaasileriffik nunatsinni illoqarfinnut tamanut 16-iusunut nunaqarfinnullu arlalinnut 2007 aallarnerfigalugu angalalluni aallartippoq, nunallu aqqinik ilisimasaqarluartut ikiorsiullugit katersillutik. Taamaaliornermi nunat aqqi kukkusumik taagorneqalersimasut inissinnerlutallu aaqqissuuppaat.
Assertuutigineqarsinnaavoq pisortatigoortumik aterineqaraluartoq Illoqqortoormiut Ittoqqortoormiinik taaneqartassasoq Nunat Aqqinik Aalajangiisartunit aalajangiiffigineqarpoq, aamma nunaqarfik Tiniteqilaaq Tiilerilaamik (Diilerilaaq) pisortatigoortumik ateqalersinneqarluni, Isortoq aamma Isertumik pisortatigoortumik ateqalersinneqarlunittaaq, tassa sumiorpaluutaannut naleqqussarneqarlutik.
