Sermersuumi inissitat pingajorarterutaat tasiilameersut
Tasiilap illoqarfiani nunaqarfiinilu 1000-t missaanniittuni 477-it kommunip ataani suliarineqarput - tamanna isumaqarluni meeqqat inuusuttullu affai kommunimit nakkutigineqartut, Kommuneqarfik Sermersuumi ingerlatsivinnut tunngatillugu nalunaarusiami allassimavoq.
Aamma atuaruk Meeqqanut inuusuttuaqqallu inissinneqartunut aningaarsartuuterpassuit
- Meeqqat angerlarsimaffiup avataanut inissinneqarsimasut 100 missaanniipput, illoqarfiullu angissusaa eqqarsaatigalugu amerlassusaat annertuvoq. Assersuussinnaavarput nuummi inissitat 180-it missaanniimmata tasiilamilu 100-juullutik, taamaattumik kisitsit annertugisassaavoq, meeqqanut ilaqutariinnut atuarfeqarfinnullu ingerlatsivimmi pisortaq Søren Valbak taama oqarpoq.
Peqqutit arlaliusut
Ukiuni kingullerni inissitat amerliartorsimasut kommunip oqaatigaa, Tasiilamiillu inissitat amerlanerujussuata peqqutai suunersut eqqoriarneqarput, tassa ilaqutariiaat ikiorneqarnissamik pisariaqartitsisut amerlanerummata, kommunimi ikiortarialinnut sullissisut amerlinerisa illoqarfiit tunumiittut tikinneqarnerulerneri, pingajuattulli innuttaasut eqquummaarinnerulernerisa nalunaarutigineqartartut amerlineri. Tamakkuli tamaasa maanna misissugarineqaleruttorput.
- Peqqutaasumik ataatsimik taasisinnaanngilanga. Kisitsit pigatsigit immitsinnut aperivugut: tamaaniuna susoqartoq? Maannakkulli akissutissarsiniarluta misissuileruttorpugut, Søren Valbak oqarpoq.
Illoqqortoormiuni ajornartorsiut annerusoq
2014-mi ingerlatsivinnut tunngatillugu nalunaarusiortoqarmat illoqqortoormiuni ajornartorsiutip tasiilamiit annertunerusoq naliligaavoq. Sulilu tamanna iluamik inissivinneqanngitsoq kommunimiit oqaatigineqarpoq.
- Qanoq inissisimasoqarnera tamakkiisumik ilisimanngilarput, sullissisussamik amigaateqarsimagaluarpugut, maannakkulli misissuilluta sulisulerluta ingerlatsileruttorpugut.
Kommuneqarfik Sermersuumi meeqqanut ilaqutariinnut atuarfeqarfinnullu ingerlatsivimmi pisortaq Søren Valbak taama oqarpoq.
Aamma atuaruk Sermersooq: Ulloq unnuarlu paaqqinnittarfiit akisuallaarput
Taassuma oqaatigaa maanna Kommunimit ilaqutariinnut tunngasuni aaqqiisoqarnissaanut pilersaaruteqartoqartoq. Angerlarsimaffiup avataanut inissiisarneq qimakkiartuaarniarlugu allatigut ikiorsiinikkut iliuuseqartoqarnissaa pilersaarutaalluni.