Aalisarnerup iluani suliffissuit Japanimi attaveqarluarnerminnik attassiinnarniarsaripput

Aalisarnerup iluani suliffiutilinni angalasut, Royal Greenlandimeersut aamma Polar Seafoodimeersut, Japanimiunik niueqateqartareerput. Taamaammat taakkua angalanerminni tuniniaaffimminnik attaveqarluarnertik attassiinnarnissaq pingaarnerpaatut siunertaraat.

- Aalisakkanik pisassiissutisiavut ikiliartuinnarmata tuniniarsinnaasagut killeqarput. Taamaammat niueqatigisartakkatta annaanaveersaarnissaat niueqatissarsinissatulli pingaartigaaq. Tunisartakkatta akiisa qaffatsilaarnissaat uani angalanitsinni iluatsinniarsimavarput, Polar Seafoodimi pisortaq Henrik Leth oqarpoq.

Nunatsinni aalisarnerup iluani suliffeqarfissuarni Polar Seafoodi Japanimi kisimi angalatitsinngilaq. Royal Greenland Japanimut aamma angalatitsivoq, taakkulu aamma Japanimut angalanertik niuerfimmik attassiniarnermut atorpaat.

- Japanimut tunisartakkagut milliardip affaata sinnerlugu massakkut naleqarput, Royal Greenlandimi pisortaq Jens K. Lyberth oqarpoq.

Aamma atuaruk Nunarput Japanimut nittarsaanneqalerpoq

Naalakkersuisut ilaapput

Nunatta Japanimut nittarsaassiartornerani Naalakkersuisut siulittaasuat Kim Kielsen, aamma aalisarnermut Naalakkersuisoq Karl-Kristian Kruse peqataapput, Royal Greenlandimiillu tamanna nuannaarutigineqarpoq.

Japanimiummi aalisakkat pisiarerusutaat qanoq piareersarneqartarnersut taamaalillutik namminneerlutik takummassuk.

- Akitsorterivinni, pisiniarfinni sutorniarfinnilu takuniaanitsinni, unammineq sakkortunera pissutigalugu pitsaassutsimut piumasaqaatit sakkortoorujussuusut uagut Naalakkersuisullu  maluginiarparput, Jens K. Lyberth oqarpoq.

Ilanngullugulu oqaatigaa Naalakkersuisut peqataanerat allamik aamma iluaqutissartaqartoq.

- Japanimi niuernermi nalunngisaqatigiinneq tatigeqatigiinnerlu aallaaviusorujussuuvoq. Uagut ulluinnarni niueqatigut naapippagut, taavalu aamma Naalakkersuisut ilisaritillugit, killormullu, Jens K. Lyberth oqarpoq.

Aamma atuaruk Kunngissap japanimiut qaleralinnik tuniniaaffigissavai

Ilungersunaraluarluni aningaasarsiorfiulluartoq

Royal Greenlandimut Polar Seafoodimullu Japanimut niuernerat ilungersunarsinnaagaluartoq, aningaasarsiorfiulluarmat suli attakkusuppaat.

-Niuerfik ilungersunartuusinnaagaluartoq pisisussat iluamik akiliisarput, aamma pitsaassutsimullu piumasaqaataanut angummassinnaakutsoorpugut, Polar Seafoodip pisortaa Henrik Leth oqarpoq