Kunngissap japanimiut qaleralinnik tuniniaaffigissavai
Kunngissakkut Naalakkersuisut siulittaasuannit Kim Kielsenimit, aalisarnermut, piniarnermut nunalerinermullu Naalakkersuisumit Karl Kristian Krusemit danskillu inuussutissanut ministeriannit Dan Jørgensenimit ingiaqatigineqassapput. Aammattaaq inuussutissarsiortut suliffeqarfiillu Nunatsinneersunit angalaqatigiinnut peqataatitaqassapput.
Tikeraarnerup siunertaraa Kalaallit Nunaata ilisimaneqarnerulernissaa, japanimiullu Nunarput pillugu ilisimasaasa annertusarnissaat, kiisalu Nunatsinni Issittumilu periarfissanik paasititsiniaaneq. Silap pissusiata allanngoriartornerata, Issittullu nunarsuarmioqatitsinnit soqutigineqaleraluttuinnarneranut Japan aamma ilanngussimavoq, Issittumi siunnersuisoqatigiinni Japan siorna alaatsinaattutut ilaasortanngorpoq.
Tikeraarnermi ullumi siullermi marsip 26-ianni suliffeqarfiit Nunatsinneersut tunisassiarisartakkatik aalisakkat qaleruallillu pisisartunngorsinnaasunut nittarsaatissavaat.
Nipilersortartut peqataassapput
Issittoq pillugu isumasioqatigiinnermi Danmarkip Nunattalu issittoq pillugu anguniakkatik unammilligassallu saqqummiutissavaat. Tassani siunertarineqarpoq japanimiut Issittoq pillugu oqallinneranni Nunatta inissisimanera paasitinniassallugu.
Japanimi Nunatta pilerisaarutigineqarnerani nipilersortartut marluk peqataatinneqassapput, tassalu Nanook aamma Nive Nielsen & The Deer Children.
Qallunaat aallartitaqarfianni japanimi nipilersornermik tunisassiortunut sammitinneqartumi sisamanngorpat unnussiuaarnermi nipilersortartut Nunatsinneersut aliikkusersuissapput.
Takornarissat, saqqummersitsineq puisillu amii
Tikeraarnerup ulluata aappaani Kalaallit Nunaat takornariarfittut sammineqassaaq. Tassani Kunngissaq Frederiup japanimi takornarialerisunut Nunatsinni misigisartakkani oqaluttuarissavai.
Tallimanngornerup ualiani Kunngissap nuliatalu saqqummersitsineq ammassavaat. Nunarput, Japan qallunaallu kunngikkormiui ataatsimoorlutik takutitsissapput. Saqqummersitsinermi japanimi kaasarikkormiut tupilaataat aatsaavissuaq saqqummersinneqassapput, Prins Henriullu kiinarpaatai Nunatsinneersut ilanngullugit. Aamattaaq eqqumiitsuliortup Nuka Gotfredsenip imilertakkanik qalipagai "Qanga" Nationalmuseumimeersut saqqummersinneqassallutik.
Ullormi kingullermi japanimi atisanik ilusilersuisarfiup ilinniarfiutigisup tusaamasap Mode Gakuenip puisip amiinik nunatsinneersunik atisat ilusilersukkatik takutissavaat. Great Greenland Kopenhagen Fur suleqatigiillutik atisanik ilusilersuisartut puisip amianut soqutiginnilersinniassavaat. Kingorna Kunngissakkut angalaqatitillu niuvertarfissuarmi Tokyo Hontenimi puisip amiinik tunisassianik saqqummersitsiniliassapput.
Aamma atuaruk Kunngissaq Kim Kielsenilu Japanilialerput
Tokyomi danskit aallartitaqarfiata Namminersorlutik Oqartussat peqatigalugit tikeraarneq aaqqissuussaraat, naggaserneqassaarlu Tokyomi apummik illuikkiamik miiterinik arfinilinnik portussusilimmik takuniaanermik. Kinguninngualu Nuka Gotfredsenip Nunatta oqaluttuarisaaneranik titartagai japanimiusuumut nutsikkat malunnartitsiniarnikkut saqqummersinneqassapput nunarsuarmi atuagaarniarfiit annersaanni.
