Kunngissaq Kim Kielsenilu Japanilialerput
Kunngissaq kunngissallu nulia Kalaallit Nunaat nittarsaallugu marsip 26-anit 28-anut Japanimi illoqarfiit pingaarnersaannut Tokyomut angalalerpata Naalakkersuisut angalaqataasitsilerput.
Naalakkersuisunit naalakkersuisut siulittaasuat Kim Kielsen, Aalisarnermut, Piniarnermut Nunalerinermullu Naalakkersuisoq Karl Kristian Kruse, Kalaallit Nunaannilu suliffeqarfinniit aallartitat angalaqataassapput.
- Angalanerup siunertaraa Kalaallit Nunaata, kalaallit kulturiat kalaallillu tunisassiaat Japanimi ilisimaneqarnerulernissaa, japanimiullu Kalaallit Nunaanni issittumilu periarfissanik paasissutissiiffiginissaat, kunngikkormiut nalunaarutigaat.
Tikeraarnerup kalaallit aalisakkanik qalerualinnillu Japanimut tunisaqartarnera annertusiniassavaa. Japanimiullu Kalaallit Nunaannut takornariarnissaannik pilerisaassallugit, puisillu amii nungutaasaanngitsumik piniakkaneerneri ersarissarneqassalluni.
Kunngissakkut, japanimilu kejserikkormiunit peqataasoqarluni, Tokyomi kalaallit kulturiat pillugu saqqummersitsinermik ammaassapput. Saqqummersitami ilaatigut tupilaat japanimi kejserikkunnit pigineqartut saqqummersinneqassapput.
Nuka K. Godfredsenip imilertakkanik qalipagai Kalaallit Nunaata oqaluttuarisaaneranut tunngasut aamma saqqummersinneqassapput, Japanimilu atuaganngorlugit aamma saqqummissallutik. Saqqummersitsiviup silataani apummik illuikkialiortoqassaaq.
