Nunarput Japanimut nittarsaanneqalerpoq

Naalakkersuisunut ilaasortat marluk kalaallit tuniniasassaataannik pilerisaariniarlutik Japanimut aallarput.
marsip 24-at 2015 10:46

Kulturitta Nunattalu pissaritaasa Japanimiunit ilisimaneqarnerulernissaat anguniarlugu, Naalakkersuisut siulittaasuat, Kim Kielsen aamma aalisarnermut piniarnermut nunalerinermullu naalakkersuisoq, Karl Kristian Kruse Japanimi Tokyomukarput. 

Karl Kristian Krusip neriutigaa Japanimiinnerminni angusaqarluarumaarlutik.

 

- Nunatsinninngaanniit niuernikkut nittarsaassinermik aallaaveqartumik Japanimiit nutaarsiassaavoq, pisuussutit pisiarineqarsinnaasut nittarsaanneqarnerat, Karl Kristian Kruse oqarpoq.

  
Japanimi Tokyomiinnerminni aalisakkanik qalerualinnillu nunatsinniit avammut tunisinissaa anguniarneqassaaq, nunatta aningaasaqarnerata siuariartornissaa qititutillugu.

 

Aamma atuaruk Kunngissaq Kim Kielsenilu Japanilialerput

 

Karl Kristian Kruselu nunatta pisuussutaanik nittarsaassinissaminut neriuuteqarluarpoq. 

 

- Nunarput siunissaq eqqarsaatigalugu, nunarsuarmi niuernikkut annertusaajuarnissamik siunertaqarnera ilutigalugu, siunissami iluaqutigisinnaanera neriuutigivara aamma taamatut kinguneqartumik angusaqartoqarsinnaassasoq, Aalisarnermut piniarnermut nunalerinermullu naalakkersuisoq, Karl Kristian Kruse, KNR-imut oqarpoq.

 

Puisip amii takusassiaralugit
Nunatsinniillu peqataasut ilaat, Great Greenlandip pisortaa, Lars Bergip, puisip amii atisaliarineqarnikut Japanimi nittarsaanniarpai. 

Japanimulli siornatigut tunisakinnikuunertik pissutigalugu neriuuteqarpallaannginnerarpoq, pisisussanilli soqutiginnittoqarluarnissaa neriuutiginerarpaa.

- Amernik tuniniaaviummat amernik piserusuttunik soqutiginnittoqarnissaa neriuutigaarput, tuniniaasarfimmillu aallartitsisoqassappat siutigut ammatippagut, taamaasilluni tuniniaanissaq sunniuteqarluarnerusumik ingerlasoqassagami, Lars Berg oqarpoq.


Puisip amianik tunisassiornerminni ilutsit inuusunnerusunut tulluarsakkat pisisartunit soqutigineqarluarsimapput. Japanimilu atisaliortarfinnut puisip amiisa atorneqarnissaat sammineqassalluni. 

- Tuniniaaffiginiakkagut inuusuttunut nutaarsiassaqarpoq, tassa puisip amia qiviunik akullugu ilusilersukkanik nutaarsiassaateqaratta, taakkulu pisisartunit maanna nuannarineqarluarput, Great Greenlandip pisortaa, Lars Berg, KNR-imut oqarpoq.

 

Kunngikkormiut kulturerpullu
Kulturitta nunattalu pisuussutaanik nittarsaassinerup saniatigut imilersarissanik qalipakkanik takutitsisoqassaaq, puisip amia kulturitsinni qanoq inissisimanera oqaluttuarineqassaaq, taamatullu Japanimiut nunatsinnut takornariartarnerat eqqartorneqassalluni.

Naalakkersuisut saniatigut kunngissaq Frederik nulialu Mary peqataassapput.

Nunatta tunisassiaminik Japanimi pilerisaarinera, marsip 26-anniit 28-ata tungaanut pissaaq.