Zelenskyj G20-t siuttuinut: Ukrainemi sorsunneq unitsinneqartariaqarpoq
Ruslandip Ukrainemik aserorterilluni sorsunnera unitsinneqartariaqarpoq, inuillu tuusintilikkaat inuunerat annaanneqarlutik. Ukrainep præsidentia Volodymyr Zelenskyj taama oqartoq nutaarsiasssaqartitsivik AFP allappoq.
Nunat suliffissuaqarfiusut annerit 20-t, tassa G20-t, Indonesiami qeqertami Balimi marlunngornermi pingasunngornermilu ataatsimeersuarnerannut atatillugu Zelenskyj taama oqarpoq.
AAMMA ATUARUK Biden Xi Jinpingilu isumaqatigiinngissuteqaraluarlutik ataatsimiittut
- Russit aserorterillutik sorsunnerat unitsinneqarsinnaallunilu unitsinneqartariaqarnera qularutiginngilara, Zelenskyj, marlunngornermi ullaakkut taama oqarpoq.
- Inuit tuusintilikkaat inuunerat taamaaliornikkut annaanneqassaaq, præsidenti oqarpoq.
Eqqisseqatigiittoqarnissaanut pilersaarusiap Ukrainep siunnersuutaata nunat G20-t malissagaat, taassuma kaammattuutigaa.
AAMMA ATUARUK Russit atomimik qaartartorsuarnik saassussisuusaarlutik sungiusarsimasut
Zelenskyj attaveqaatit aqqutigalugit ataatsimiinnermi peqataavoq, USA-p præsidentia Joe Biden Kinallu præsidentia Xi Jinping ilaatigut oqalugiarfigalugit.
Ruslandip præsidentia Vladimir Putin ataatsimeeqataanngilaq. Tassunga taarsiullugu Ruslandip nunanut allanut tunngasunut ministeria Sergej Lavrov Balimi ataatsimeersuarnermi peqataavoq.
Russit atorfilittaasa atomimik qaartartorsuarnik atuisinnaanissamut sioorasaarutaat silaqanngitsuliornerusut unitsinneqartariaqartullu, Zelenskyj aalajangersumik oqarpoq.
