Russit atomimik qaartartorsuarnik saassussisuusaarlutik sungiusarsimasut

Russit sakkutuui atomimik qaartartorsuarnik saassussisuusaarlutik Polenip Litauenillu akornanni nunaminertami Kaliningradimi sungiusarsimapput. Ruslandip illersornissamut ministereqarfia pingasunngornermi taama nalunaaruteqarpoq.

Ukrainemut saassussinerup ulluisa 70-ianni taama nalunaaruteqartoqarpoq. Inuit tuusintilikkaat Ukrainemi sorsunnermi maannamut toqutaasimapput, inuillu 13 millionit najukkaminnit qimaasariaqarsimallutik.

Nunat allat akuliutissappata atomimik qaartartorsuarnik atuisinnaanissaq, Ruslandip præsidentiata Vladimir Putinip, Rusland Ukrainemik februaarip ulluisa 24-anni saassussilermalli toqqaannanngikkaluartumik sioorasaarutigisimavaa.

Qaartartut ungasissumut igeriuttakkat Iskanderimik taaguutillit russit sakkutuuinit igeriunneqartutut sungiusarneqartut, illersornissamut ministereqarfiup oqaatigaa. Qaartartut tamakku atomimik qaartartulersorneqarsinnaapput.

AAMMA ATUARUK Putinip tv-kkut saqqummiinera: Ruslandip atomimik sakkulersornini annertusivaa

Sakkutuut saassussinerit ataasiakkaat sungiusarpaat, soorlu aamma qaartartunik igeriuttakkanik arlalinnik igeriussineq sungiusaraat. Qaartartunut igeriuttakkanut illersuutit, mittarfiit, nunap atortulersuutai, sakkutuut atortui sakkutooqarfiillu saassunneqarnissaat russit sakkutuuisa sungiusarpaat.

Nunat killiit sorsunnermut akuliutissappata piaarnerpaamik qisuariartoqarumaartoq, Ruslandip præsidentiata siusinnerusukkut mianersoqqussutiginikuuaa.

Atomimik qaartartorsuarnik atuisinnaanissap periarfissaasinnaanissaa, Ruslandimi naalagaaffiup tv-qarfiata innuttaasunut siusinnerusukkut oqaatiginiarsarisimavaa.

Naak mattutivinneqarsinnaanngitsutut nalilerneqaraluartoq, rRussit atomimik qaartartorsuarnik atuinissaat ilimanarpallaanngitsoq, illersornissaq pillugu nunani killerni naliliisartut atorfillillu amerlasuut arlaleriarlutik oqaatigisarsimavaat.

Atomimik qaartartorsuarnik atuilluni sorsuttoqalernissaa pinngitsoortinniarneqartoq, Ruslandip nunanut allanut tunngasunut ministeriata Sergej Lavrovip sapaatiummat oqaatigaa.