Pineqaatissinneqarsimasunut inissiisarfiit hashi pillugu suliamit tatineqartut
Nunani allani tigummigallarneqartut immikkoortitaanissaannut isertitsiviit immikkut ittut imaluunniit parnaarussivinni immikkoortortaqarfiit immikkut ittut atorneqartarput, nunatsinnili pineqaatissinneqarsimasunut inissiisarfiit ammasut taamatut periarfissaqartitsinngillat. Taamaammat hashimik anngiortumik eqqussuisoqarsimanera pillugu suliamut Eqqartuussisoqarfik Sermersuumi maanna suliarineqartumut tunngatillugu unnerluutigineqarlutik tigummigallarneqartut arlaliusut isumaginissaat politiinut Pinerluttunillu Isumaginnittoqarfimmut suliassaavoq imaannaanngitsoq.
Hashi pillugu suliami ataasinngormat ullaakkut aallartinneqartumi unnerluutigineqartut arfineq-marluupput, 25-nit 38-nut ukiullit. Taakku politiit Nuummi Danmarkimilu 2017-imi juulip 25-ani suliniuteqarmatali politiit qaammatini arfineq-pingasuni paasiniaanerisa nalaani imminnut attaveqarfigisinnaajunnaarsillugit tigummigallarneqarput.
AAMMA ATUARUK Hashi pillugu tigusaaqqasut tigummigallarneqarnerat sivitsorneqartoq
Pinerluttunik Isumaginnittoqarfimmut pineqaatissinneqarsimasunut inissiisarfinnut akisussaasumut suliassaq unammillernartuuvoq:
- Tigummigallarneqartut inissiisarfitsinniitinneqarnerinut tunngatillugu suliami tigummigallarneqartut arfineq-marluunerat unammillernartuuvoq, taakkumi imminnut allanullu attaveqarsinnaajunnaaqqatillugit inissinneqartussaammata, Nunatsinni Pinerluttunik Isumaginnittoqarfimmi Pineqaatissiissutit naammassinissaannut Isumannaallisaanermullu pisortaq, Thomas Fredhøj, taama oqarpoq.
Taassuma ilisimatitsissutigaa Nuummi inissiisarfik inunnut amerlanerpaamik tallimanut immikkoortitsiviusinnaasumik anginngitsumik immikkoortortaqartoq. Taamaakkaluttorli, Thomas Fredhøj ima oqarpoq:
- Tamatumali tamakkiisumik aaqqiissutaannginnera ajornartorsiutaavoq. Immikkoortitaaqqagaluarlunimi inissiisarfiup illutai pissutigalugit attaveqaqatigiinnissap ajornanngitsuaraanera ajornartorsiutaavoq, illorsuarmi immikkoortitaanissamut aaqqissugaanngimmat.
Inissiisarfinniittunut killiliisoq
Tigummigallarneqartut immikkoortitaanerini pineqaatissinneqarsimasunut inissiisarfimmi ammasumiittussaagaluartunut killilersuutaasoq Isumannaallisaanermut Pineqaatissiissutillu naammassinissaannut pisortap oqaatigaa.
- Inissiisarfiimmi qanoq ilusilerneqarsimaneri eqqarsaatigissagaanni, ammasuunissaat tunngaviuvoq. Allanik atugassaqartillaallutik allaanerulluinnartumillu killersorneqarlutik inissiisarfinni tigummigallarneqartut amerliartortillugit, taava inissiisarfiit aallaqqaammut siunertaasumut naleqqiullugu matoqqanerulersittariaqarpagut. Taamaammat oqartoqarsinnaavoq inissiisarfinni assigiinngitsuniittunut sunniuteqartoq, Thomas Fredhøj oqarpoq.
AAMMA ATUARUK Sapaatit akunneri pingasut eqqartuussisoqassaaq
Inissiisarfittaaq matoqqasumik immikkoortortaqarfeqassaaq
Nuummi inissiisarfittaassami matoqqasumik immikkoortortaqarfeqassaaq, taannalu tigummigallarneqartunut 20-nut piffissamilu killiligaanngitsumi pineqaatissinneqarsimasunut 20-nut inissaqartitsissaaq. Inissiisarfittaassaq pineqaatissinneqarsimasunut katillugit 79-inut inisaqartitsissaaq, inissallu immikkoortortaqarfinnut ammasunut marlunnut agguataarneqarsimassallutik. Inissiisarfittaassaq pilersaarutit malillugit 2019-imi upernaakkut atorneqalissasoq pinerluttunik isumaginnittoqarfiup nittartagaani atuarneqarsinnaavoq.