OQALLINNEQ Kinguaariit affaat ingerlariaqqinngitsoortartut

Inatsisartunut qinersinissami qineqqusaarnerit unnugu aallarteqqissapput. Tamatumuuna sammisat assigiinngitsukkuutaarlugit qineqqusaartunut apeqqarissaartoqassalluni. Unnugu siulleq aallakaatinneqartussaq ilinniartitaanermut tunngavoq.

Alt for mange unge får ikke en uddannelse.

Allattoq Alice S. Olsen

novembarip 12-at 2014 12:21

Ukiut tamarluinnaasa atuartorpassuit ilinniakkamik ingerlatitseqqinneq ajortut immikkut sammineqassapput.

Meeqqat atuarfiini ajornartorsiutit suli annertupput. Atuaqatigiinnik ilinniartitsiniarneq ajornakusoorpoq. Tamatumalu kinguneraa meeqqat atuarfianni naammassisut aaffaasa missaaniittut ilinniakkamik ingerlatitseqqinngitsoortarnerat.

Unnuk mannalu tamanna sammineqassaaq.

Aamma atuaruk Ilinniartitaaneq qineqqusaarnermi pingaarnertut sammineqartoq

Atuagaasiveqaratik inortuillutik takkuttut, nerineqannginnamillu iluamik malinnaasinnaanngitsut ulluinnarni atuaqatigiinni naapitassaapput.

Piffissarujussuaq ilinniartitsinermut atorneqartussaagaluaq allamut atorneqartarpoq. Tamannalu atuartut 10. klassimi naammassigaangata angusaanni takuneqarsinnaasarpoq. Taakkumi affaat kisimik ilinniagaqartarmata.

Nunarput namminersulissappat Ilinniartitaanerup pitsanngorsarnissaa pisariaqarluinnartoq aningaasaqarneq pillugu ataatsimiititaliap tikkuartuarpaa.

Unnuk mannalu qineqqusaarnermi partiit qanoq ilillutik meeqqat atuarfiinik pitsanngorsaaniarnertik saqqummiutissavaat. Inuusuttut ilinniarnerup iluani siunissaqarluassappata – qanorpiaq iliorniarpat?

Qineqqusaarluni apeqqarissaarneq kalaallisut arfineq-pingasunut qiteqquppat aallartissaaq, danskisullu qulingiluanut aallartissalluni.