VIDEO WWF-ip aasami sikuusartutuaq kingornutassatut eriagisassanngortinniaraa
Suliniaqatigiiffik videoliamini taama oqarpoq.
- Kalaallit Nunaanni inuit uumasullu ataatsimoorlutik ukiuni tuusintilikkuutaani sikumiipput. Siku uumasullu uummatitsinniipput, Julie Berthelsen videoliami oqaluttuarpoq.
WWF naapertorlugu Issittumi sumiiffiit allat 2040-p missaani aasakkut sikusarunnaarpata nunatta Canadallu avannamut sineriaat aasakkut sikusartutuaalissasut ilisimatuussutsikkut paasisat takutippaat.
Taamaammat suliniaqatigiiffik tamatuma , Last Ice Areamik suliniaqatigiiffimmit taagorneqartup, kingornutassatut allattorsimaffimmut ilanngunnissaanut siunnersuusiorpoq, siunnersuutillu Naalakkersuisunit ingerlateqqinneqarnissaanut atsiornernik maanna katersilluni.
- Silap pissusaata allanngoriartornera pissutigalugu, Issittumi aasaanerani sikuusartoq ukiut qulikkaarlugit 13 procentimik annikilleriartarpoq. Ilisimasarput naapertorlugu Issittoq annilaarnartumik allanngoriartorpoq, tamannalu uumasunut sunniuteqarujussuarluni, WWF nittartakkamini allappoq.
- Aasami sikuusartutuaq kingornutassatut eriagisassanngorpat, uaguunnaanngitsoq kisianni silarsuaq tamaat sianiginissaanut pisussanngussaaq, Julie Berthelsen videoloami oqarpoq.
WWF-imit video uani takuuk: