WHO-p Europami inuit 250.000-ngajaat coronavirusimik toqquteqassasut naatsorsuutigaa

Europami inuit 250.000-ngajaat coronavirusimik qaammatini tulliuttuni pingasuni toqquteqarsinnaapput.

Naalagaaffiit Peqatigiit peqqissuunissaq pillugu suleqatigiiffiata WHO-p missingersuutaani tamanna takuneqarsinnaavoq. Inuit tunillatsittut amerliartuinnavinnerat WHO-p ernummatigaa:

- Tamaani coronavirusimik sapaatit-akunnerata siuliani toqquteqartut 11 procentinik amerlipput, WHO-p Europami qullersaa Hans Kluge oqarpoq.

AAMMA ATUARUK Coronap suminngaaneerneranik WHO-p misissuisitserusunnera Kinap akuerinngikkaa

Inuit pingaartumik coronavirusip allannguutaanik Deltamik tunillatsittarput. Inuillu akiuussuserneqarsimanngitsut tunillanneqaqqajunnerupput. Nunani assigiinngitsuni oqartussat maleruaqqusanik aamma qasukkaaminerat pissutaalluni virusi tuniluunneruvoq.

Europami innuttaasut coronavirusimut akiuussusersorneqarnerisa amerliartorpallaarunnaarneranni WHO-p missingersuutaa saqqummiunneqarpoq.

Europami innuttaasut affaasa missaat tamakkiisumik akiuussuserneqarsimapput. Nunanili ataasiakkaani akiuussusersuinerit assigiinngisitaartorujussuupput.

AAMMA ATUARUK Nunat assigiinngitsut akiuussutissanik eqqanaarsassanngitsut WHO-p qinnuigai

Europami nunat pissakinnerusut ilaanni innuttaasut 6 procentiinnaasa missaat coronavirusimut tamakkiisumik akiuussuserneqarsimapput.

Nunarsuarmi coronavirusimik toqquteqartut piffissami kingullermi ullormut 10.000-t missaann iittarput.

Europami inuit 1,3 millionit coronavirusimik maannamut toqquteqarsimasut nunat assigiinngitsut peqqinnissaqarfiisa nalunaarsorsimavaat.

Coronavirus 2019-imi decembarimi nalunaarsorneqaqqaarmalli inuit katillugit 4,5 millionit sinnerlugit nappaat toqqutigisimavaat. USA-mi ilisimatusarfiup Johns Hopkins Universityp kisitsisaataasa tamanna takutippaa.