Coronap suminngaaneerneranik WHO-p misissuisitserusunnera Kinap akuerinngikkaa
Naalagaaffiit Peqatigiit peqqissuunissaq pillugu suleqatigiiffiata WHO-p coronavirusip qanoq pinngorsimaneranut misissuinerminnik nangitseqqinnissamik pileraaruteqarnera Kinamit sisamanngornermi itigartitsissutigineqarpoq.
Ilimagineqarpoq, virusi ajutoorneq peqqutaalluni laboratoriamiit anillattoorsimasinnaasoq.
- Sumit pinngortuunerata nassaariniarnera, nalinginnaasumik silatusaarnermut ilisimatusarnermullu ilaatigut naapertuutinngimmat akuerinngilarput, Kinami viceministeri tusagassiutinut nalunaarummi taama allappoq.
AAMMA ATUARUK Nunat assigiinngitsut akiuussutissanik eqqanaarsassanngitsut WHO-p qinnuigai
WHOp niuerfinni laboratorianilu sukumiinerusumik misissuisoqarnissaa pillugu siunnersuut qaammammi uani saqqummiunneqarpoq, pilersaarulli taamatut isikkoqartillugu Kinamit akueriuminaatsinneqarpoq.
USAp præsidentia Joe Biden maajimi oqarpoq, nammineq piumasarigini virusi qanorpiaq aallartissimanera pillugu ullut 90-t ingerlanerani paasiniaaqqissaartoqassasoq aammalu nalunaarusiortoqassasoq.
