WHO-p qullersaata nunat kuppillammik tunillaassuuffiusut suleqatigiinnissamut kaammattorai
Nunat kuppillammik, mpoximik maanna taaguuteqartinneqartumik tunillaassuuffiusut, nappaatip tuniluutilertunnginnissaanik suleqatigiittariaqartut, Naalagaaffiit Peqatigiit peqqissuunnissaq pillugu suleqatigiiffiata WHO-p qullersaata Tedros Adhanom Ghebreyesusip kaammattuutigaa.
Kuppillammik, tassa mpoximik Sverigemi siullerpaamik tunillatsittoqarsimanera sisamanngornermi uppernarsarneqareersorlu taama kaammattuuteqartoqarpoq.
- Nunani tamalaani nakkutiginninnerusoqartariaqalerpoq, paasissutissanillu avitseqatigiittoqartariaqarluni. Nappaatillu tuniluunnera pillugu ilisimasanik katersisoqartariaqarluni, WHO-p qullersaa inoqatinut attaveqaqatigiittarfikkut X-ikkut tallimanngornermi allappoq.
Nunat tamalaat akiuussutissat pillugit paasissutissanik avitseqatigiittariaqartut WHO-p qullersaata aamma kaammattuutigaa, soorlu aamma nunani tamalaani ajornartoornerit pillugit paasissutissanik avitseqatigiittariaqarneraraa.
Meeqqanut aqqaneq-marluk 17-illu akornanni ukiulinnut mpoximik tunillanneqarsimasunut akiuussutissami oqartussanit akuersissutigineqarnissaa qinnutigisimallugu, nakorsaasiorfiup Bavarian Nordicip tusagassiorfinnut nalunaarummi tallimanngornermi ilisimatitsissutigaa.
Bavarian Nordicip tamanna pillugu misileraanernit paasissutissat, EU-p nakorsaatinut nakkutilliisoqarfianut, EMA-mut, nassiussimavai, akiuussutimi Imvanexip akuersissutigineqarnissaa neriuutigalugu.
Akiuussut taanna inersimasunut atorneqarnissamut akuersissutigineqareerpoq. Imvanex, mpoximut akiuussutini EMA-mit USA-llu nakorsaatinut nakkutilliisoqarfianit FDA-mit kisiartaalluni akuersissuteqarfigineqarpoq.
Naalagaaffiit Peqatigiit peqqissuunissaq pillugu suleqatigiiffiata WHO-p nappaatip mpoxip tuniluutilertornera nunani tamalaani ajornartoortitsisutut pingasunngornermi aggustip ulluisa 14-ianni nalilerpaa. Afrikami nunat ilaanni DR Congomi tuniluutilertornera, kingornalu nunanut sanilerisanut siammaannera matumani pissutaavoq.
