Webby-award tunniunneqalerpat Nunarput qitiussaaq
Tusaamasanngornerup maluginiarneqarneq malitsigigajuttarpaa, tamannalu isiginnaartitsisartup nunarpassuarni ilisimaneqartup Nicolai Coster Waldaui misigaa, taannami Visit Greenland sinnerlugu takornariartitsinermi nittartakkap nersornaatisiassaa tigussavaaa.
- Nersornaat tigulerutsigu maluginiarneqassaqaagut tamannalu sapinngisarput tamaat atorluarniarsariniarparput. Maluginiarneqassaqaagut Coster Waldau USA-mi tusaamasaasorujussuummat, tamannalu pissutigalugu nersornaat tiguniarlugu qaqigutta qitiulluinnartumut inissittussaavugut, Malik Milfeldt Visit Greenlandimiit oqarpoq.
Nersornaasiinerni nersornaaserneqartup qujaniarluni oqalugiaataa maluginiarneqartarpoq. Ilaatigulli takisoorujussuarnik suut tamaas ilanngullugit oqalugiartoqarsinnaasarpoq, tamannali Webby Award-imik nersornaasiissut sillimmartaarfigaat. Taakku piumasaraat oqaatsit tallimaannaat atorlugit qujaniartoqartassasoq.
- Qujanartumillu kalaallit oqaasiisa takinerujussuat iluaqutaassaaq. Tassami Coster-Waldau-ip kalaallisut oqaatsit takisuut pingasut oqaatigissavai, tamatumalu kingorna USA-mi tv-mi isiginnaartunut Coster Waldau-ip oqaasii Ella Grødemip tuluttut oqaatsinik marlunnik oqaatigissavai. Maanna oqaatigissanngilara qanoq oqarniarnersoq, kisianni ilimagaara USA-mi tv-mi isiginnaartut nuannersumik tupaallallutillu misigisaqarumaartut nittartakkatta maluginiarneqarneruneranik kinguneqartumi, Malik Milfeldt ullaaq manna KNR-imut oqarpoq.
Nersornaatip tunniunneqarnera internetimut attavillit malinnaaffigisinnaavaat nalunaaqutaq 19.30-ip missaanniik uani: www.webbyawards.com