Watson pineqaatissinneqarsimasunut inissiisiarfimmiiginnassasoq, aalajangiisoqangajalertorli
Arferit pillugit suliniutilik Paul Watson maanna 74-inik ukioqartoq, juulip 21-anili Nuummi pineqaatissinneqarsimasunut inissiisarfianiitoq. Decembarip 18-ata tungaanut suli pineqaatissinneqarsimasut inissiisarfianiiginnassasoq.
Taamaalilluni ulluni 16-ini suli pineqaatissinneqarsimasunut inissiisarfimmiikkallassaaq.
Kalaallit Nunaanni politiit tusagassiutinut nalunaarummi allapput.
Paul Watsonip Japanimiunut arfannianut akornusersuisimasutut ukiut 14-it matuma siornatigut illersuiniarnikkut akornusiisimanera pillugu tigusarineqarnissaanik Japanimiut peqqussuteqarnikuupput.
Danmarkimi Inatsiseqarnermut ministereqarfiup Paul Watson Japanimut tunniunneqassanersoq aalajangiunneqarnissaata tungaanut Watson suli pineqaatissinneqarsimasunut inissiisarfimmiitinneqarpoq.
Sermitsiap allaaserisaa naapertorlugu Watsonip tigummigallarneqarnissaa decembarip 30-ata tungaanut sivitsorneqassasoq unnerluussisussaatitaasup kissaatigigaluarpaa.
Danmarkimilu Inatsiseqarnermut ministereqarfik ullut 14-it qaangiutsinnagit aalajangiissalluni ilimasaarutigaa.
