Wangenheim nakorsat nunanit allaneersut tikigasuarsinnaanerannut: Neriulluarpunga
Nunatsinni peqqinnissaqarfinni nakorsanik peqqissaasunillu amigaateqarneq, Inatsisartut pingasunngornermi apeqqarissaarnerminni eqqartungaatsiarpaat.
Peqqissutsimut naalakkersuisoq, Anna Wangenheim, apeqqarissaarfigineqarpoq. Apeqqarissaarnermi nunatta sineriaani nakorsassaaleqineq sammingaatsiarpaat. Assersuutigalugu Ittoqqortoormiini nakorsaqannginnera aamma maluginiarneqarpoq.
AAMMA ATUARUK Sulinissamut akuersissutit sukkanerusumik suliarineqartassapput
Nunatsinni amerlanerusunik nakorsaqaleqqullugu, nunanit allaneersunik suliartortoqarsinnaanera pillugu aaqqissuussinermut tunngasumik Nunatta Qitornaaneersoq, Aleqa Hammond, aperivoq.
Aaqqissuussap taassuma nakorsat nunani allaninngaanneersut nunatsinnut sukkanerusumik suliartorsinnaanissaat qularnaassavaa. Aaqqissuussarlu taanna Anna Wangenheimip taperserpaa:
- Nunanit allaninngaanneersunik sulisussanik sukkanerusumik tikisitsisalernissamut tunngatillugu isumalluartorujussuuvunga, soorunami, Anna Wangenheimip Aleqa Hammondip apeqquteqaataanut taama akissuteqarpoq.
Missingiut piareeqqavoq
Nunanit allaneersut suliartornissaannut suliat sukkanerunissaa aatsaat eqqartorneqalinngilaq. Tassami aatsitassanut sulisoqarnermullu naalakkersuisuusimasup Erik Jensenip (S) nunanit allaniit sulisoqarnermut tunngatillugu naalakkersuisuunermini 2019-imi tamatuminnga suliniuteqaqqaarpoq. Nunat allamiut akuliunnissaannut ministeri, Mattias Tesfaye tamatumunnga ikiuukkusuppoq.
nunani allaneersut nunatsinni peqqinnissaqarfimmut pilertornerusumik suliartorsinnaanissaat pillugu aaqqissuussinisamut missingiut suliarineqaruttulersoq, Aatsitassanut sulisoqarnermullu naalakkersuisup, Jess Svanep, naalakkersuisoqarfia tusagassiutinut oktobarip aqqaneq aappaani nalunaarpoq.
- Suliniut piareersarneqaleruttorpoq, Jess Svane nunanit allaneersut suliartornissaanut suliniummut tunngatillugu allappoq.
Suliniutip piviusunngortinneqarnissaanut missingiut partiinit tamanit akuerineqarnissaa utaqqineqarpoq.
