EU-mit tikeraarneqarneq: Von der Leyenip neriorsuutini eqquutsikkaa
EU Kommissionip siulittaasua, Ursula von der Leyen Nuummut ullumi tikissaaq, taassumalu danskit ministeriunerat Mette Frederiksen (Socialdemokratiet) aamma naalakkersuisut siulittaasuat, Jens-Frederik Nielsen (D) ulluni tulliuttuni marlunni pilersaaruteqarfigai.
EU siulittaasua Múte B. Egedep (IA) naalakkersuisunut siulittaasuunerani kingullermik 2024-mi marsimi tikeraarpoq. Ursula von der Leyenilu EU-p illoqarfiit pingaarnersaanni allaffittaavata atoqqaartinneqarnissaanut atatillugu tassani tikeraarluni.
Politikerit pingasut taamani pingaarnertut uku oqariartuutigaat: ilinniartitaaneq, silap pissusia aatsitassallu.
Nunatsinnilu aatsitassat Ursula von der Leyenip kingullermik tikeraarneranili sammineqalerput.
Kisianni aamma allanik pisoqarnikooqaaq – ilaatigut USA-mut tunngatillugu pissutsit, tassungalu atatillugu USA-p sakkutooqarnikkut siunissami nunatsinniinnissaanut atatillugu massakkut isumaqatiginninniartumik, suleqatigiissitamik qaffasissunik pilersitsisoqarluni,
EU-p nunatsinni aningaasaliinerusalerusunnera tikeraarnerani kingullermilli oqaluuserineqarpoq.
EU-mit nunatsinnut aningaasaliissutit amerlanerusut
EU-p siulittaasauta nunatsinnut aningaasatigut tapiissutit suli amerlanerusut saqqummiunniarai, Múte B. Egedep pingasunngornermi oqaatigaa. Aningaasat 200 millionit eurot, tassa 1,5 milliardit koruunit naliligaat, Financiel Timesip oqaatigaa.
1,5 milliardit koruunit EU-p nunatsinnut 2027-p tungaanut aningaasaliissutaasa 225 millionit eurot qaavisigut aningaasaliissutigineqassapput.
Europa-Kommissionip 2028-mit 2034-mut missingersuutissamini tapiissutit marloriaatinngortinniarsarai KNR-ip siorna septembarimi saqqummiuppaa. EU 530 millionit eurot tassa 4 milliardit koruunit tapiissutigisalerniarpai.
Tikeraarneranni ulluni marlunni suut oqaluuserineqassanersut pilersaarummi ersarissumik allassimanngilaq.
Politikerilli pingasut umiatsiamik angalaarlutik isumaqatigiissutinik marlunnik atsiugaqassapput.
Ikinngutigiinnerulernissaq
Politikerit taakku pingasut umiatsiamik aallanngitsiarnerminni tusagassiuutinut oqaaseqarput.
- Tikeraarneq ikinngutigiinnerulernissamik suleqatigiinnerulernissamillu siunertaqarpoq, Jens-Frederik Nielsen (D) oqarpoq.
EU-Kommissionip siulittaasuata Ursula von der Leyenip nunatta EU-llu suleqatigiinnerulersikkusullugit, tusagassiuutinut oqarpoq.
- Ukiut marluk matuma siorna maaniikkama, uterlunga suliniutinik annertuunik saqqummiussiumaarlunga. Tamanna piviusunngortissinnaallugu ullumikkut oqaatigissavara.
- Sivisuumik ikinngutigiippugut, naleqartitagut assigiipput, ukiunilu tulliuttuni ataqatigiinnerulernissatsinnut suleqatigiilluarsimavugut, Ursula von der Leyen oqarpoq.
EU-mit aningaasaliinermi paasissutissat erseqqinnerusut ataasinngorpat saqqummiunneqarumaarput, tv2 allappoq.
Qoornumut tikittut
Jens-Frederik Nielsenip Mette Frederiksen Ursula von der Leyenilu peqatigalugit Qoornumut sapaammi ualikkut tikinneranni erinarsorfigineqartut, KNR-ip tusagassiortuata oqaatigaa.
Politikerit pilersaarutit malillugit Qoornumi pisuttuassapput, Nuummullu uterunik umiarsuaq alapernaarsuut HDMS THETIS takornariarlugu.
KNR-ip tikeraarnerat malinnaaffigissavaa. Ulluni tikeraarfiusunit assit uani takukkit.
