Von der Leyen: EU sorsuttoqaratarsinnaaneranut piareersimasariaqarpoq
EU sorsuttoqaratarsinnaaneranut piareersimasariaqarpoq.
EU-Kommissionip siulittaasua, Ursula von der Leyen, Europa-parlamentimut oqalugiarami taama ilaatigut oqarpoq.
Sorsuttoqaleratarsinnaanerali maannangaaq aarlerinaateqanngilaq, sorsuttoqaleratarsinnaavorli, von der Leyen oqarpoq.
Sakkunullu imassanik nioqqutissiornerup marloriaatinngortinneqarnissaa pilersaarutaasoq, von der Leyen oqarpoq:
- Artillerigranatit 2 millioninit amerlanerusut 2025 naatinnagu sanaartortoqareersimassaaq, taanna oqarpoq.
EU-mi nunat illersornissaqarfitik sanaqqillugillu nutartertariaqaraat taanna isumaqarpoq, sakkussianik pilersuinerit annertusarneqartariaqarlutik aningaasaliiffigineqarnerusariaqarlutillu.
Russit pigisaasa 285 milliardit dollarinik, tassa 1956 milliardit koruunit missaannik nalillit arsaarinnissutigineqarnissaat pillugu oqallinnissamut piffissanngortoq, EU-Kommissionip siulittaasuata oqaatigaa.
Aningaasat taakku sakkussianut Ukrainemut tunissutissatut atorneqarsinnaasut, taanna oqarpoq.