EU-p russit aningaasaataat tigoqqusaanngitsut Ukrainemik ikiuinermut atorusukkai

Russit aningaasaataat tigoqqusaanngitsut Ukrainemi sorsunnermi ajoqusikkanut taarsiiniarnermut atorneqassasut, EU-p kissaatigaa.

EU-Kommissionip siulittaasua, Ursula von der Leyen, videoliami Twitterikkut saqqummersinneqartumi taama oqarpoq.

- Ruslandip aserortikkani akilertariaqarpai. Ukrainemi ajoqusikkat 600 milliardit Eurot missaannik naleqarnissaat missiliunneqarpoq, Ursula von der Leyen oqarpoq.

600 milliardit Eurot assigaat 4500 milliardit koruunit missaat.

AAMMA ATUARUK WHO: Ukrainemi ukiuunerani inuppassuit inuunerannik naleqarsinnaavoq

Rusland Ukrainemi sorsunnermi ajoqusikkanik akiliinianngippat, aningaasarpassuit taakku ilaasa Ukrainep nunani killerni iligisaasa innuttaasuisa akileraaruteqartarnerannit aningaasalersorneqaratarsinnaapput.

- Rusland inuinilu aningaasaatilissuit Ukrainep sanaqqinneqarnissaanut akiliisariaqarput. Ruslandillu akiliinissaanut aningaasaateqarpugut, Ursula von der Leyen oqarpoq.

Ruslandip qitiusumik aningaaserivissuanit aningaasat 300 milliardit Eurot, tassa 2200 milllirdit koruunit sinnerlugit, Ruslandimit tigoqqusaanngitsut pigalugit taassuma tikkuarpaa. Aningaasat taakku Ukrainep sanaqqinneqarnissaanut atugassat affaasa missaraat.