WHO: Ukrainemi ukiuunerani inuppassuit inuunerannik naleqarsinnaavoq
Ukrainemi inuit millionilikkaat inuunerat ukiuunerani ulorianartorsiortinneqarsinnaasoq, Naalagaaffiit Peqatigiit peqqinnissakkut suleqatigiiffiata, WHO-p, mianersoqqussutigaa.
Ruslandip Ukrainemi innaallagissamik pilersuinermi atortunik aserorterilluni saassussisaqattaarnera pissutaalluni Ukrainemi inuit millionilikkaat inuunerat ulorianartorsiortinneqarsinnaasoq WHO-p mianersoqqussutigaa.
WHO-p Europami nunap immikkoortuani qullersaata Hans Klugep, Ukrainep illoqarfiisa pingaarnersaat Kyiv tikeraaqqammerpaa.
Ukrainemi innuttaasut ukiuunerani aniguiniartariaqassasut taanna tusagassiortunut sassarnermi oqarpoq.
2 - 3 millionit missaanniittut najugaqarfitsik qimassagaat
Ukrainemi nunap atortulersugaanerata saassunneqaqattaarnera pissutaalluni Ukrainemi peqqinnissaqarfimmut kingunipiloqartoq oqaatigaa, innuttaasullu peqqissusaannut aamma kinguneqartitsillutik.
Rusland Ukrainemik ukioq manna februaarip ulluisa 24-anni saassussilermalli Ukrainemi peqqinnissaqarfiup illuutai assigisaalu assigiinngitsut 700-nit amerlanerusut maannamut eqqorneqarsimasut WHO-p nalunaarsorsimavaa.
Ukrainemi innuttaasut 2 aamma 3 millionit akornanni najugartik ukiuunerani qimassagaat Hans Klugep ilimagaa, inissianut kiassarneqarsimasunut isumannaatsunillu ujartuinissaat taassuma oqaatigaa.