Timersorneq Volleyballertartut kattuffiat nutaamik siulittaasortaassaaq

Nunatsinni volleyballertartut kattuffianni KVK-mi siulittaasunngorniarluni unammisoqarumaarpoq pissartanngorniunnerit Ilulissani porski sioqqullugu aallartitsinnagit.

Apriilip pingajuat ileqquusumik ataatsimeersuarnermi KVK-mi siulittaasoq Aalipaaraq Kreutzmann qinigassanngorteqqinnianngilaq.

- Siorna ataatsimeersuarnermi nalunaarutigereerparat ukiormanna siulersuisunut qinersisoqarnissaani qinigassanngorteqqinniarnanga, Aalipaaraq Kreutzmann KNR-mut oqarpoq.

Nunatsinni volleyballimi suleqataanera ukiuni qulikkaani arlariinni ingerlavoq unammisartutut, sungiusaasutut minnerunngitsumillu kattuffimmi siulittaasutut.

Aalajangerneq imaannaanngitsoq

Siulittasutullu tunuarnissaa arlaatigut takkuttussaareerpoq.

- Aalajangiarneq imaannaanngilaq aamma qamuuna annernalaarpoq, Aalipaaraq Kreutzmann oqarpoq, taamaattorli:

- Namminerli isumaqarpunga sivisuallaamik tassani inissisimallunga allallu nangitsitsariaqartut, Aalipaaraq Kreutzmann oqarpoq.

Nuannaarutiginerarpaalu siulittaasussarsiornissamut arlallit qinigassanngortinniarmata.

Ilaasortat ikiliartornerat KVKp aqqusaareerlugu ukiut kingulliit suliniutit aallartisarneqarput amerlanerit volleyballertalernissaannik kinguneqarniartussat.

- Siulersuisoqatikka neriuuteqarfigilluarpakka. Sulersussuseqarput aammalu siulersuisuni peqatigiiffilerinermilu misilittagaqarlutik. Taamaattumik nangitsisussaqarpoq, Aalipaaraq Kreutzmann oqarpoq.

KVK-mi siulittaasumut qinersinerup saniatigut allatsimik siulersuisunilu ilaasortamik qinersisoqassaaq.

Arnanut inuusuttuaqqanut nuna tamakkerlugu sungiusaasutut Aalipaaraq Kreutzmann ingerlaannassaaq taannali aamma tunuariartorfigissallugu ilimasaarereerpoq.

Volleyballimi GM Ilulissani pissaaq apriilip sisamaaniit arfineq pingajuat ilanngullugu. Volleyball GM KNR-TV-mi toqqaannartumik aallakaatinneqassaaq.