Nunatta VM-mut anngunniunniapiloornera: Makitsineq periarfissat kingullersarissavaat
NACHC-p, Nunatta peqataaffigisaata, VM-imut anngunniutsitsinissaa suli corona pissutigalugu qularnartoqarpoq. Imaaratarsinnaavoq unamminertaqanngitsumik VM-imut anngutsitsisoqartoq.
Unammersuarnernik kikkut aaqqissuinissaat aammalu ullut unammiffiusussat pingasunngornermi unnukkut ataatsimiinnermi oqaluuserineqaraluartut aalajangertoqanngilaq.
- VM-imut anngunniunnissamut kikkut aaqqissuinissaannut ullunillu unammiffiusussanik toqqaanissaq oktoberip aallaqqaataanut kinguartinneqarpoq, NACHC-mi unammersuarnermut ataatsimiititaliami siulittaasoq Kurt Lauritsen KNR-mut oqarpoq.
Puerto Rico maannamut kisiartaalluni NACHCp VM-imut anngunniutsitsinissaanut aaqqissuisussatut toqqarneqarpoq tassanilu 2021-mi Egyptenimi VM-imi inissaq ataaseq unammissutigineqassaaq.
Malittarisassat sukangasut
Unammersuartoqassappat malittarisassat atuuttussat amerlapput. Qeqertamut tassunga Caribiamiittumut tikissinnaassagaanni coronamut misissortinneq sivisunerpaamik nalunaaquttap akunnerinik 48-nik pisoqaassusilik pigineqartussaavoq.
Peqataasussat sumiiffimmi aalajangersimasumiit aneqqusaanatik ’pullartamik’ taasamiiginnaqqusaassapput tassanilu nerisinneqartassapput.
Unammisut iligiit marluusut arsartui kisimik timersortarfimmeeqqusaapput isiginnaartoqassananilu. Unammeqataanngitsunit inuit marluk kisimik isiginnaartut issiaviineeqqusaassapput.
NACHC aamma nunanut peqataaniarlutik nalunaartunut ilisimatitsivoq Puerto Ricomi peqqinnissamut oqartussat peqataasut malitassaanik nalunaarusiortut.
Taarsiullugu Uruguayimut unammiartorsinnaaneq tikinneqaraluarpoq.
- Tamannali ornigineqanngilaq, Kurt Lauritsen oqarpoq.
Makitsineq
Assammik arsarnermi nunarsuaq tamakkerlugu kattuffik IHF nalunaarpoq makitsinikkut anngutsitsineq periarfissatut kingullerpaatut isigineqartoq.
Unamminertaqanngitsumik VM-imut anngutsitsisoqassappat arlalinnik tamanna aalajangiiffigisassartaqarpoq. Isummerfigineqartussaavoq nunat sorliit makitsinermi peqataassanersut aammalu nunani tamalaani kattuffissuaq makitsisitsisuussanersoq.
Maanna tassa NACHC-mi ilaasortat oktoberip aallaqqaataata tungaanut isumaliutigisussanngorpaat anngunniuttoqassanersoq imaluunniit makitsisoqassanersoq.