VM-imut anngunniunneq KNR-p aallakaatittussaanngikkaluarpaa, KNR ataatsimiigiaqquneqarpoq politikkikkullu kissaateqarfigineqarlunilu
Aalajangertoqareeraluartoq
Arnat assammik arsarlutik VM-imut anngunniunnissaat KNR-p kanaliatigut aallakaatinneqartussaanngikkaluarput, taarsiullugulu aallakaatitassiortartut Made in Nuuk-mik atillit aallakaatitsisussaagaluarlutik.
Maajilli 29-iani KNR-mi pisortat Ilinniartitaanermut, Kultureqarnermut, Timersornermut Ilageeqarnermullu pisortaqarfimmit ataatsimiigiaqquneqariasaarput.
Ataatsimiinneq Ilinniartitaanermut, Kultureqarnermut, Timersornermut Ilageeqarnermullu naalakkersuisuusimasumit Peter Olsenimit (IA) aallaaveqartoq.
Politikkikkut kissaat
Nunatsinni tusagassiorfiit aningaasalersorneqarsinnaajumallutik soqutigisaqaqatigiiffinnut partiinullu arlaannaannulluunniit attuumassuteqaqqusaanngillat
Tamanna KNR tamanut saqqummersitsisartutut isumaqatigiissutaani ukiuni sisamani atuuttussami allassimavoq ulluinnarni aallakaatitassiornerit politikkikkut akuliunnernik imaqartinneqassanngitsut.
Tamannalu taaneqartarpoq: politikerit sulianut akuliuttussaatitaannginnerat, tassuunakkut qulakkeerneqartarpoq tusagassiutit KNR-tut ittut arlaannaannulluunniit attuumassuteqassanngitsut aammalu tusagassiortutut kiffaanngissuseqartussaatitaasut.
KNR-p pisortaa Karl-Henrik Simonsen aamma naapertorlugu, kultureqanermut pisortaqarfik KNR-p sunik aallakaatitsinissaanut aalajangiisussaatitaanngilaq.
- Matumunnga angertinniagaasimanngilagut. Kisianni kikkut tamarmik isumagineqarnissaat kissaatigigaat ersarissorujussuuvoq. Tassalu tamanna uagutsinnut kisianni aamma TAAK-mut oqariartuutavoq. Kisianni akuliuttussaannginnertik ilisimaarivaat, tanna oqarpoq.
Politikkikkut kimigiiserfigineqarnersi pillugu tassa taava aallakaatitsiinnarpisi?
- Naamik, politikkikkut kimigiiserfigineqarnerput pissutaalluni aalajanginngilagut. Tamanit kimigiiserfigineqarpugut politikkikkut aamamlu assammik arsartartut kattuffiannit uagutsinniillu, aaqqissuussamut taamak annertutigisumut aallakaatitsinissarput tamanit naatsorsuutigineqarpoq.
Ersareqaaq
Kultureqanermut naalakkersuisumik ataatsimeeqateqarnerup inerneraa, KNR kanalimini assammik arsarluni VM-imut pissartanngorniunnermik aallaakaatitsiinnarmat.
Tamanna Made in Nuuk suleqatigalugu iluatsissinnaasimavoq, taakkulu toqqaannartumik aallaatitsisussatut siullertut KNR-mit isumaqatigineqarsimapput
Politikerit akuliuttussaannginnertik atuutsikkaat isumaqarpit?
- Aap naamilu. malunnarpoq siullermik aalajangiussatsinnut isumaqataanngitsut, akulerutinngillalli.
Peter Olsenip kissaataatut
Ilinniartitaanermut, Kultureqarnermut, Timersornermut Ilageeqarnermullu naalakkersuisoqarfimmi pisortaasoq Karl Davidsen naapertorlugu politikerit akuliuttussaatitaannginnerat pivoq akuliutinngillallu.
- Naalakkersuisoqarfiup KNR ataatsimeeqatigivaa, naalakkersuisullu kissaataa piviusunngortippaat, piumasaqaateqartoqanngilaq kissaatilliuku saqqummiunneqaannartut, taanna KNR-mut oqarpoq.
Kultureqarnermut naalakkersuisuusimasoq Peter Olsen (IA) facebookimi quppernerminut ima allappoq:
- Naluneqanngitsutut “ajoraluartumik” KNRTV aqqutiginagu namminersortorli aqqutigalugu taamaallaat internet aqqutigalugu aallakaatinneqartussanngoraluarluni.
- Ajoraluartumik” kingunerisussanngoraluarpaa inuppassuit aammalu isorliunerusuneersut malinnaasinnaannginnissaat
Uffalu inuiaqatigiit aningaasarpassuarnik aningaasaleeqataanikut, Peter Olsen oqarpoq nangipporlu:
- Tamanna pillugu naalakkersuinikkut pingaartissimavarput nuna tamakkerlugu aallakaatinneqarsinnaanissaa
KNR-miit Peter Olsen oqaaseqartinniarsimagaluarparput saaffiginnissutitsinnulli akissuteqanngilaq.
