Vivian Motzfeldt: Suleriaasissamik piareersimasoqanngilaq, ilissili nukissaqartitsivusi

'Matup illuatungaani susoqarnissaa ilisimanngilarput [...] ataaserli qularnaatsoq iseriartornitsinni uummammioraarput nukittoqqutigalugulu, tassa ilissi nukik uagutsinnut tunniussarsi - ajunngitsumik kissaassinersi tatiginninnerlu uagutsinnut tunniussarsi'. 

Nunanut allanut naalakkersuisuusimasup, Vivian Motzfeldtip danskit nunanut allanut ministeriat, Lars Løkke Rasmussen peqatigalugu Amerikamiut januaarimi ataatsimeeqatiginerat facebookikkut allakkamini oqaasertalerpaa.

Nunat pingasut akornanni isumaqatigiissummik sapaatip akunnerani aggersumi atsioqatigiittoqartussanngornerani allagaqarpoq.

Naalakkersuisuusimasup suleqatigiissitap, januaarimi ataatsimiinnermi inerniliunneqartup nunat pingasut akornanni isumaqatigiissuteqarnerannik inerneqarnera nuannaarutigaa.

- Maanna nuannaarpunga tulluusimaarlungalu januaarimi suleqatigiissitaq pilersitarput nunat pingasut akornanni isumaqatigiissummik tamat peqataaffigisinnaasaannik naammassisaqarsimalermata, atsioqatigiinnissarlu isumaqatigiissutigineqarluni.

Tamanna pingaaruteqartuusoq facebookikkut allappaa.

 Vivian Motzfeldt ataatsimiinnermi kingorna kalaallinut toqqaannartumik nalunaaruteqarpoq:

- Asasakka nunaqqatikka, nalunngilara tamassi malinnaasusi. Ulloq una tamatsinnut pissanganarsimavoq, oqarsinnaavungali ataatsimiinneq ingerlalluarsimammat. Ataqqeqatigiinneq tunngavigalugu oqaloqatigiinnerit ingerlasimapput. Siunissami aqqutit siumut isigisumik ingerlanniarlugit isumaqatigiissimalluta, taanna ataatsimiinnerup kingorna oqarpoq.

Taassumalu allakkamini suliaq suli naammassinngitsoq, isumaqatigiissuteqartoqangajalersorli allappaa.

- Suliassalli tamaanga uninnavianngillat, ukiorpassuarni nunatta tusaaneqarusulluni naapertuilluartumillu pineqarusulluni tamaviaaruteqartuarsimanera nunarsuarmioqatigiinnit tusaaneqarpoq.

- Nunatta takutippaa qanoq nukittutiginini nunatta takutippaa pineqartilluta tamatigut peqataasassasugut peqataagaangattalu pitsaasunik angusaqartitsillutalu angusaqartartugut, taanna allappoq. 

Isumaqatigiissutip sapaatip akunnerata tulliani atsiorneqarnissaa naatsorsuutigineqarpoq.