Kinamut angalaneq Vittup Randillu isornartorsiorpaat

Naalakkersuisut angalaqataallu amerlasuut, novemberimi Kinamut angalanerat pisariaqarnersoq    isumaliutigineqarsinnaavoq.

Taama oqarpoq illuatungiliuttut partiianni Demokraatini siulitaasoq  Randi Vestergaard Evaldsen. 

Kim Kielsen isumaqarpoq angalaneq pisariaqartoq 

Naalakkersuisunut ilaasortat angalaqataallu katillutik 18-niullutik Kalaallit Nunaat nittaarsaallugu Kinamut siorna novemberimi angalapput.  Angalanermi Naalakkersuisunut ilaasortat sisamat angalaqataapput. 

Angalaneq millionit koruunit affaannik akeqarpoq,  angalaqataasullu qulingiluat timmisartumi akisunermi ilaapput.  

Tamannalu illuatungiliuttut partiiata Demokraatit siulittaasuata Randi Vestergaaard Evaldsip pisariaqarnersoq apeqquserpaa.

 - Aningaasarpassuit eqqartorneqarput,  taamaammat tassaniippoq annertunerpaaq apeqqutigisarput, ilumut 20-ngajaat aallarnissaat pissusissamisoorsimanersoq, Randi Vestergaard Evaldsen Qanoruumut ippassaq taama oqarpoq. 

Kim Kielsen, Karl Kristian Kruse aamma  Hans Enoksen  sisamaallutik Kinamiinnerminni aaqqissuussanut assigiinngitsunut tallimanut peqataasut, Qanoruup aallakaatinneqarnerani saqqummiunneqarpoq.

AAMMA ATUARUK Kinamut angalaneq Kielsenip ajoriffissaqartinngikkaa

Mute Bourup Egede immikkut aaqqissuussanut najuuppoq.

Naalakkersuisut siulittaasuata Kim Kielsenip Qanoruumi aalajangiussimallugu oqaatigaa, angalaqatigiit taama amerlatiginissaat pisariaqarsimasoq. 

  - Ilaana pisariaqarpoq,  assersuutigalugu Aatsitassanut Naalakkersuisoq allamut ataatsimiigiarpoq,  Inuussutissarsiornermut Naalakkersuisoq allamut ataatsimiigiarpoq aamma Aalisarnermut Naalakkersuisoq allamut ataatsimiigiarpoq,  taamaammat pissusissamisoorpoq  Naalakkersuisut Kinamut angalanerat, Kim Kielsen oqarpoq nangillunilu, - uani pisariaqarluinnartutut isigaara,  nunarsuarmioqatigiilluta immitsinnut nittarsaanniarsarivugut,  nuna namminiilinissamut aqqutaaniinniarsarisoq  imminut mattukkaluttuinnassava ?  taamaammat tamanna illuatungilerlugu oqariartuutigisariaqarpara, ammanerusumik ingerlasariaqarpugut,  Naalakkersuisut siulitaaasuat Kim Kielsen Qanoorumi taama oqarpoq. 

AAMMA ATUARUK Naalakkersuisut Business Class atorlugu angalaqatigiinnerat 397.000 koruuneqartoq

Nunanut allanut tunngasunut Naalakkersuisuusimasoq aamma Partiimik Nunatta Qitornaanik aallartitsisoq Vittus Qujaukitsoq Kinamut angalasimaneq pillugu Facebookimi allaaserisaqarpoq.  
Taanna isumaqarpoq, Naalakkersuisunut ilaasortat marluk kisimik angalasinnaagaluartut.     

AAMMA ATUARUK Nunatsinneersut tuniniagassanik Kinami pilerisaarisut