Kinamut angalaneq Kielsenip ajoriffissaqartinngikkaa
Naalakkersuisut Kinamut novembarip qaammataani tikeraarmata angalaqataasut qulingiluat Business Class atorlugu angalapput.
Angalanermut aningaasartuutigineqartunit millionip affaata missaanniittunit taakkununnga billetsit qulingiluat 400.000 koruuningajannik akeqarput.
Angalaqatigiillu Business Classimik toqqaanerat inatsisinut naapertuuppoq. Kim Kielsen KNR-imut akissuteqarluni allappoq aningaasat taama amerlassuseqartut angalanermut atussallugit amerlavallaarsorisassaanngitsut:
- Naalakkersuisunut tunngatillugu, angalanermi ingerlanneqartumi angalariaatsimilu toqqarneqartumi, nalinginnaanngitsumik eqqunngitsumilluunniit takusaqarsinnaanngilagut, Naalakkersuisut siulittaasuat qisuariaateqarluni KNR-imut mailikkut taama allappoq.
AAMMA ATUARUK Naalakkersuisut Business Class atorlugu angalaqatigiinnerat 397.000 koruuneqartoq
Kim Kielsenip oqaatigaa Naalakkersuisut angalanermikkut Kinamiut naalakkersuisuinit qaaqqusissut akuerisimagaat. Aamma tikeraarneq Nunatsinnik nunattalu soqutigisaanik nittarsaassinermut atorneqartoq.
- Tamannalu naalakkersuisut sulinerannut pissusissamisoortumik pisariaqartumillu ilaasutut Naalakkersuisut isigaat, tassalu nunap soqutigisaata nunani allani siuarsarneqarnissaannut tapertaammat, Naalakkersuisut siulittaasuat taama allappoq.
Tikeraarnermi aatsitassarsiornerup tungaatigut suleqatigiinnissamik isumaqatigiissuteqartoqarsimanera, ilisimatusarnikkut workshoppertitsinissamik isumaqatigiissuteqartoqarsimanera mittarfiliortiternermillu suliniutissat aningaasalersorneqarnissaat pillugu ataatsimiittoqarsimanera ilaatigut innersuussutigaa.
- Kinamut tikeraarnermi angalanermut aningaasartuutigineqartut Naalakkersuisut allaanerutinnagillu angalanerup akianut naleqqiullugu iluaqutaanngitsutut isiginngilaat.
