Illersornissamut milliardit Nutatta iluaqutigissagai neriuutigineqartoq

Nunat NATO-mut ilaasortaasut BNP-mik 2 procentiinik sakkutooqarnermut aningaasartuuteqarnissamik pisussaaffeqarnerminnik eqquutsitsinnissaanik USA-p piumasaqarnerata kingunerisaanik Danmarkip sakkutooqarnikkut aningaasartuuteqarnerunissaa oqallisigineqarpoq. Danmarkip BNP-mi 1,17 procentiinnaanik sakkutooqarnermut aningaasartuuteqartarpoq.

Sakkutooqarnermut aningaasartuuteqarnerunissaq politikkikkut tapersersorneqartoq, danskit irakimi sakkutuuinut tikeraarami illersornissamut ministerip ersersippaa, illersornissamullu ministerip siunnersuummik oktoberip aallaqqaataani saqqummiussinissani neriorsuutigaa.

AAMMA ATUARUK Pituffik pillugu NATO-mut akikillisaasoqartarsimanera ilumuunnginneraraa

Taamalu neriorsuuteqarmat,  illersornissamut ministereqarfiup Issittumi suliassai pillugit misissueqqissaarnerminni saqqummiussinissaasa piviusunngortinneqarnissaat Vittus Qujaukitsup neriuutigilerpaa.

- Nalunaarusiap innersuussutai tunngavigalugit Nunatta imartaani annaassiniartartunik siunissami nukittorsaarujussuaqataasinnaasugut neriuutigaara, Vittus Qujaukitsoq KNR-imut allappoq.

Nunatsinni innuttaasut Illersornissamut Qullersaqarfiup suliassaanut akuutinneqarnerunissaannut ilinniagaqarnissaannullu suliniutit, soorlu umiarsuarni alapernaarsuutinut, Issittumi illersornissami ilinniarnermut, Siriusillu alapernaarsuisuinut suliniutit Vittus Qujaukitsup aamma eqqaavai.

NATO-p qullersaata, Jens Stoltenbergip, Danmarkimut sapaatit akunnerata siuliani tikeraaqqammernerani politikkikkut tapersersuineq nalunaarutigineqarpoq.