Ritzau Politikki

Danmark illersornermut aningaasartuuteqarnersoriaqartoq

Politikerit atugarissaarnermut aningaasartuuteqarneruniarput. Nunarsuarli navianarneruleqqavoq, Nunat Killiit Illersoqatigiiffiani pisortaq danskinut tikeraannginnermini oqarpoq.

Allattoq Ritzau

marsip 16-at 2017 09:07

Nutserisoq Connie Fontain

Danmarkip Nunat Killiit Illersoqatigiiffiani suleqatiminut neriorsuuteqarneratulli danskit politikerii illersornissamut ukiuni aggersuni aningaasartuuteqarnerussapput.

Nunat Killiit Illersoqatigiiffiani generalsekræteri, Jens Stoltenberg Danmarkimut pisortatigoortumik sisamanngornermiit ulluni marluni tikeraartussaq erseqqissumik taama oqariartuuteqarpoq.

Nunamini naalagaaffiup tunisaasa ataatsimut nalinganit 2 procentit illersornissamut ukiuni qulini atussallugit Nunat Killiit Illersoqatigiiffiani naalagaaffiit naalakkersuisullu siuttui tamarmik 2014-imi ataatsimeersuarnermi neriorsuuteqarput.

Tamannalu anguniagaq anguneqassaaq, Nunat Killiit Illersoqatigiiffiani pisortaq oqarpoq.

- Nunat tamarmik Danmark ilanngullugu pisussaassuserminnik anguniakkaminnillu suliaqarnissaat naatsorsuutigaara, Stoltenberg tikeraannginnermini danskit nutaarsiassaqarfiinit apersorneqarami oqarpoq.

AAMMA ATUARUK Pituffik pillugu NATO-mut akikillisaasoqartarsimanera ilumuunnginneraraa

- Tamannali nunat assigiinngitsut piffissani assigiinngitsuni iliuuserissagaat akueraara, Stoltenberg oqarpoq.

Jens Stoltenberg norgemi ministeriusimavoq, ministeriunerminilu 1990-ikkunni norskit illersornissaamut atugaannik nammineerluni annikillisaasimavoq.

- Sorsunnerup nillertup kingorna pissannganartorsiorunnaarnermi illersornissamut aningaasartuutit annikillisinneri naliginnaavoq, Stoltenberg oqarpoq.

- Pissannganartorsiornerillu takkunneranni illersornissamut aningaasartuutit qaffanneqarsinnaasariaqarput, Stoltenberg oqarpoq.

AAMMA ATUARUK Danmarkip NATO-mit akikillisaavigineqartarnera takussutissaqanngitsoq

Politikerit tamarmik inuiaqatigiit atugassaarnissaannut paaqqutarinninnermut, atuarfinnut aqqusinernullu aningaasartuuteqarnerunerat Jens Stoltenbergip ilisimalluarpaa.

- Politikkikkut sivisuumi suliaqarsimaninni ilisimavara peqqinnissamut, paaqqutarinninnissamut atuarfinnullu pisariaqartitanut aningaasartuuteqarani illersornissamut aningaasartuuteqartariaqarnerup nassuaasernissaa politikeriulluni ajornakusoorsinnaasoq.

AAMMA ATUARUK Qujaukitsoq præsenterer ønskeliste for NATO-chef

- Illersornissamulli aningaasartuutaarutiivinnissaq nunarsuarmi pitsaanerpaassaaq.

Nunat Killiit Illersoqatigiiffiatali generalsekræteria naapertorlugu nunarsuatsini taamaattoqanngilaq.

- Nunarsuaq piitsuunerulersimavoq, taamaammat illersornissamut aningaasartuuteqarnerusariaqarpugut, Stoltenberg oqarpoq.