Visit Greenlandip Amerikamiut siunnerfigai

Nunatsinni takornariartitsinermut Siunnersuisoqatigiiffiup - Visit Greenlandip - suliniuteqarnermini USA-mi angalatitsisartut maanna siunnerfiginialerpai. Washingtonimi aamma New Yorkimi maajip aallartilaarnerani assigiinngitsunik aaqqissuussinertigut tamanna pissaaq.

Allattoq Hagen Højer Christensen

apriilip 30-at 2015 11:39

Nutserisoq Elisa Isaksen

Amerikamit Avannarlermit takornariartartut Nunatsinni takornariartitsinermut annerujartuinnartumik pingaaruteqaleriartortut Visit Greenlandip pisortaata Anders Stenbakkenip oqaatigaa.

Tassami nittartakkamut greenland.com-imut paasisassarsiorlutik isertartut 26 procentii USA-meersuupput, taakkulu Danmarkimit Tysklandimillu paasisassarsiortut katinnerinit amerlanerupput.

Taama soqutiginninneq Islandimut aamma atuuppoq. Tamaanimi Amerikamiut Islandimut angalasartut ukiuni kingullerpaani tallimani 200 procentingajannik amerleriarsimapput.

- Sumut ineriartortoqarnera erseqqeqaaq. Taamaattorli USA-mi Kalaallit Nunaannik soqutiginnilersitsinissaq immini siunertaanngilaq. Amerikamiut maanga angalarusulernissaat angusariaqarparput, Anders Stenbakken erseqqissaavoq.

Aamma atuaruk Nipilersorneq aqqutigalugu takornariat amerlineqarniarput

Taamaattumik aaqqissuussinerni angisuuni pingasuni New Yorkimi aamma Washingtonimi maajip aallartilaarnerani pisussani Visit Greenland peqataassaaq.

Visit Greenland New Yorkimi Skandinaviamiut Illuanni Kalaallit Nunaat maajip arfernanni immikkut ulloqartinneqarpat Visit Greenland aaqqissuisuussaaq.

Sapaatip akunnerata naanerani maajip qulingiluaanni qulingannilu Washingtonimi angisuumik aaqqissuussinerni marlunni Kalaallit Nunaat ussassaareqataassaaq, ilaatigut kalaallit kulturiat misigisassarsiorfigineqarsinnaassalluni, ilaatigullu Greenland Eyes Filmfestivalimeersunik filminik takutitsisoqassalluni.