Inuussutissarsiutit Kulturi

Nipilersorneq aqqutigalugu takornariat amerlineqarniarput

Nunatta avammut nittarsaanniarneqarnerani periarfissat allat ujartorneqarput, takornariallu amerlineqarnissaat pillugu nipilersorneq aamma aqqutiginiarneqarluni.

Allattoq Sandra Meinecke, Mads Lynge

novembarip 16-at 2014 15:54

Iluliarsuit, qimusserneq, arferit, arsarnerillu.

Nunatta takornarianut avammut nittarsaanniarneqarnerani tamakku pilerisaarutitut atorneqakkajupput. Allanilli aamma periarfissaqartoq Visit Greenland isumaqarpoq.

Nipilersornerlu matumani eqqarsaatigineqarpoq. Tassami nittartagaq Nunatsinni nipilersornermut tunngasoq music.greenland.com, Visit Greenlandip ippassaq ammaramiuk.

Videoliat, assit, inuillu assigiinngitsut allaaserisaat nittartakkami pineqartumi alakkarterneqarsinnaapput, tassami nuannaartorinnittut nipilersortartullu allaaserisaat atuarneqarsinnaassammata.

Aamma atuaruk Aatsitassat takornariaqarnerlu sammineqassapput

Nunatta kulturiata assigiinngisitaarnera music.greenland.com-imi takutinniarneqartoq, Visit Greenlandip pisortaata Anders Stenbakkenip KNR-imut oqaatigaa.

- Nunarput nipilersullaqqissunik ulikkaarpoq, Nunatsinni, Nunatsinneersullu Nunatta avataani najugallit. Naallu ilaatigut aamma kalaallisuinnaq taalliaqaraluartoq, erinnat kikkunnilluunniit tusarnerineqarlutillu nuannarineqarsinnaapput, aamma nunani allani, Visit Greenlandimi siunnersortaanerup Malik Milfeldtip oqaatigaa.