Virusi tuniluuttoq USA-mut annguttoq

Coronavirusi Kinami Asiamilu nunani marlussunni taamaallaat marlunngornerup tungaanut siumorneqarpoq. USA-mulli annguppoq.
Angut tunillanneqarsimasoq 30-t sinnerlugit ukioqartoq ajunngitsoq nalunaarutigineqarpoq. Taanna napparsimmavimmi Seattlemit ungasinngitsumi uninngavoq, nutaarsiassaqartitsivik AP taama allaaserisaqarpoq. Assi © : AFP/Ritzau Scanpix
Allattoq Ritzau
januaarip 22-at 2020 08:43
Nutserisoq Bikki P. Kleist

Coronavirusimik tunillanneqarsimasoq siulleq USA-mi siumorneqarpoq. Nutaarsiassaqartitsivik AP taama allaaserisaqarpoq.

Angut Seattlemeersoq Kinami angalareerluni Seattlemut tikittoq coronavirusimik tunillanneqarsimasoq paasineqarpoq.

Angut pineqartoq Kinami illoqarfissuup Wuhanip eqqaaneereerluni USA-mut sapaatip-akunnerata siuliani uterpoq. Coronavirusi tassani annerusumik maannamut siumorneqarsimavoq.

AAMMA ATUARUK Virusi allanartoq Kinami illoqarfinnut allanut perngaammik siaruaattoq

Angut 30-t sinnerlugit ukioqarpoq, ajunngitsorlu nalunaarutigineqarluni. Taanna napparsimmavimmi Seattlemit ungasinngitsumi uninngavoq. Nutaarsiassaqartitsivik AP taama allaaserisaqarpoq.

Inuit coronavirusiminit tunillanneqarsimasut maannamut qulingiluat nappaat toqqutigisimavaat, inuillu ikinnerpaamik 430-t tunillanneqarsimanissaat aarleqqutigigitsik, Kinami oqartussat oqaatigaat.

Coronavirusi sarsvirusimut - ingammik Kinami 2002-mi 2003-milu inunnit 650-it missaannit toqqutigineqartumut - assingummat uissuummisitsivoq.

AAMMA ATUARUK Coronavirusip Kinami sumiiffinnut allanut siammarnissaa WHO-mit aarlerigineqartoq

Coronavirusip Kinami sumiiffinnut allanut - nunanullumi allanut - ulluni tulliuttuni tuniluuteqaratarsinnaanera, nunat tamalaat akornanni peqqinnissaq pillugu suliniaqatigiiffiup, WHO-p marlunngornermi nalunaarutigaa.