Virusi allanartoq Kinami illoqarfinnut allanut perngaammik siaruaattoq
Inunnit maannamut pingasunit toqqutigineqarsimasumik kinamiut hunnorujulikkaat virusimut sarsimut assingusumik viruseqalersimapput.
Kinami inuit virusimik allanartumik tunillatsissimasut katillugit 201-iupput, amerlanerpaartaallu illoqarfimmi Wuhanimi Kinamiittumi tunillatsissimallutik.
Virusi sumi pinngorsimanersoq ilisimaneqanngilaq, Wuhanimili aalisakkanik niuerfimmi pinngorsimassangatinneqarluni.
Tamatuma saniatigut nunani allani tassa Thailandimi inuit marluk Japanimilu inuk ataaseq taassuminnga viruseqalersimasoq paasineqarpoq. Inuit taakkua Wuhanimit tikeraartuusut, nunani taakkunani oqartussaasut oqaatigaat.
Wuhanimi 11 millioninik innuttaasulimmi inuit 170-it missiliorlugit napparsimmavinni nakorsarneqarput, taakkunanilu qulingiluat perulullutik.
Unitsitaasimasuni 25-it nakorsarneqarnermikkut ajorunnaareersimasut, Wuhanimi peqqinnissamut ataatsimiititaliarsuup ilisimatitsissutigaa.
Virusi allanartoq nutaajusoq corona-virusiuvoq, taannalu virusimut sarsimut - Kinami Hongkongimilu 2002-mi 2003-milu inunnit 650-init toqqutigineqartumut - assingutinneqarluni.
Kinami oqartussaasut oqarnerat naapertorlugu virusip pineqartup inuit akornanni aattuuttarneranik takussutissaqanngikkallarpoq, taamaaratarsinnaanerali miserratissaanani.
Virusi taanna nutaajusoq virusi sarsitulli navianartigigunanngitsoq, sulili annerusumik ilisimasaqarfigineqanngikkallartoq tassungalu akiuussutissamik aamma peqanngitsoq, immikkut ilisimasallit oqaatigaat.