Nunatsinni suliffeqarfiit qarasaasiatigut isumannaallisaanermut 50.000 koruuninik tapiiffigineqarsinnaasut

Qarasaasiatigut saassunneqarneq suliffeqarfinnut akisoorujussuusinnaavoq. Suliffeqarfippaaluit nunatsinneersut tamanna maanna misigivaat.

Ikiorneqarnissamulli maanna periarfissaqarput.

Ilaatigummi qarasaasiatigut saassunneqannginnissamik siunnersorneqarnissamut aningaasaliissutit 50 millionit koruuniusut marluk 249-llu akornanni sulisoqarlutik suliffeqarfiutilinnit Danmarkimi Erhvervsstyrelsemut qinnuteqarfigineqarsinnaapput.

AAMMA ATUARUK Nunarput qarasaasiatigut pinerliinianut isumannaallisarnerulertoq

Periarfissaq tamanna nunatsinni suliffeqarfinnut CVR-ilinnut, tassa Danmarkimi Det centrale Virksomhedsregisterimi nalunaarsoqqasunut aamma atuuppoq.

Aningaasat 50.000 koruunikkaarlugit suliffeqarfinnut tunniunneqartarput, taakkulu suliffeqarfiup qarasaasiaatigut isumannaallisaanermi qanoq inissisimaneranik misissuinermut qanorlu pitsanngorsarneqarsinnaaneranik siunnersuinermut atorneqassallutik.

Aningaasallu taakku suliffeqarfiup qarasaasiatigut isumannaallisaanermi qanoq inissisinameranik takussutissamik qinnuteqarnermut aamma atorneqarsinnaapput. Takussutissaq taannna suliffieqarfiup qarasaasiatigut isumannaallisaanermi qanoq inissisimaneranik ersersitsissaaq.

Aningaasanik qinnuteqarnissamut Erhvervsstyrelsip nittartagaatigut periarfissaq ukioq manna marsimi ammaanneqartoq, suli qinnuteqarfigineqarsinnaavoq.

Nunatsinni qarasaasiatigut saassussinerit 

Nunatsinni suliffeqarfiit pisortallu suliffeqarfiutaat qarasaasiatigut siornamiit maannamut piffissap ingerlanerani saassunneqartut arlaliupput. 

Kommune Kujalleq qarasaasiatigut maannamut saassunneqartuni kingullersaavoq. Kommune Kujallermi qarasaasiatigut oktobarimi saassunneqarpoq, tamannalu ilaatigut isumaginninnermi ikiorsiissutinik, soraarnerussutisianik akilersuutinillu tunniussisinnaajunnaarneranik kinguneqarpoq. 

AAMMA ATUARUK Kommune Kujallermi qarasaasiatigut saassussineq: Inunnut paasissutissat ingerlateqqinneqarsimasinnaasut

Kommune Kujalliulli qarasaasiai atuleqqilertuleraluartut inuit ataasiakkaat pillugit paasissutissaatai allanut ingerlateqqinneqarsimanissaannik aarlerinaateqangaatsiarput. 

- Siammaanerup qanoq annertutiginera maanna ilisimaneqanngilaq paasiniarneqarlunili. Paasissutissanik siammaaneq qanoq annertutiginersoq ilisimaneqaleriarpat kommuni innuttaasunut nittartakkani aqqutigalugu paasissutissiiumaarpoq, kommune tusagassiuutinut nalunaarpoq.

Kommune Kujalleq nunatsinni qarasaasiatigut saassunneqartuni kisiartaanngilaq. Aamma Royal Greenland, Namminersorlutik Oqartussat Peqqinnissaqarfillu qarasaasiatigut ukiumi kingullermi saassunneqartunut ilaapput.