Kommune Kujallermi qarasaasiatigut saassussineq: Inunnut paasissutissat ingerlateqqinneqarsimasinnaasut
Nunatsinni qarasaasiatigut saassussinerit ukiut kingulliit ingerlaneranni nalinginnaanngoraluttuinnarput, Kommune Kujallerlu saassunneqartuni kingulliugallarpoq.
Kommunip qarasaasiaata serverii oktobarimi saassunneqarput, tamannalu pissutigalugu kommunip isumaginninnermi ikiorsiissutit, soraarnerussutisiat akilersuutillu tunniussinnaasimanngilai.
Kommune Kujallermi innuttaasunit makku tamatigut eqqumaffigineqarnissaat kommunimit kaammattuutigineqarpoq:
- Mailinik, allakkanik, akiligassanik ilimaginngisanik nassitsisunit ilisarisimanngisanit nassiussarsisoqarsimanersoq.
- Nammineq qarasaasiatigut isumannaallisaaneq eqqumaffigilluarneqassasoq. Assersuutigalugu qarasaasiakkut isumannaallisaaneq pillugu aningaaserivinniit kaammattuutit misissoqquneqarput.
- Qarasaasiakkut niuerniarniaraani MIT ID atorneqassasoq.
- Isissutissat (password) akuttunngitsumik allanngortinneqartassasut.
Qarasaasialli maanna sapaatit akunnialui qaangiuttut atuleqqipput, kommunillu qarasaasiatigut ingerlatsineq nalinginnaasunngoriartoqqilersoq maanna paasissutissiissutigaa.
AAMMA ATUARUK Kommune Kujallermi qarasaasiat nalinginnaasumik ingerlaqqilerput
Inunnulli ataasiakkaanut paasissutissat Kommune Kujalliup qarasaasiaaniittut allanut ingerlateqqinneqarsimanissaat ilimanaateqarluarpoq.
- Siammaanerup qanoq annertutiginera maanna ilisimaneqanngilaq paasiniarneqarlunili. Paasissutissanik siammaaneq qanoq annertutiginersoq ilisimaneqaleriarpat kommunip nittartagaa aqqutigalugu kommune innuttaasunut paasissutissiiumaarpoq, kommune tusagassiuutinut nalunaarummi allappoq.
Nunarput isumannaallisaanerulersoq
Nunatsinni qarasaasiatigut unioqqutitsisumik isaasoqarnissaata isertortukkullu alapernaarsuisoqarnissaata aarlerinarnerunera pissutigalugu Namminersorlutik Oqartussani Digitalimik Sullissinermut Aqutsisoqarfiup Illersornissaqarfiup Isertortumik Paasiniaasartuisa Qarasaasiatigut isumannaallisaanermut sullissivia 2020-mi suleqatigilerpaa.
- Royal Greenland qarasaasiatigut 2021-mi decembarimi saassunneqarami attaveqaataanut ullorpaalunni akornusiivoq. Tamanna ilaatigut sulisut tamakkiisuunngitsumik aningaasarsinerannik kinguneqarpoq
- Namminersorlutik Oqartussat qarasaasiatigut marsimi saassunneqarami nunatsinni kommunit arlallit attaveqaataannut akornusiillunilu Inatsisartut upernaakkut ataatsimiinnerisa unikkallarneranik kinguneqarpoq
- Peqqinnissaqarfiup attaveqaatai maajip aallartisimalaarnerani akornuserneqarujussuarput. Tamanna qarasaasiatigut saassunneqarsimaneranik peqquteqartoq, saassunneqarneraniit ullualuit kingorna paasineqarpoq.
- Kommune Kujalleq qarasaasiatigut oktobarimi saassunneqarami ilaatigut innuttaasut pisartagaannik tunniussisinnaajunnaarpoq.
Danmarkimit ikiuineq Namminersorlutik Oqartussani naalakkersuisoqarfiit, pisortaqarfiit immikkoortortallu attaveqaataasa illersornissaqarfiup nittartakkakkut pisunik misissueqqissaartarfiata attaveqaataanut ulloq unnuarlu nakkutigisaasunut atassusernerannik ilaqarpoq.
AAMMA ATUARUK Nunarput qarasaasiatigut pinerliinianut isumannaallisarnerulertoq
- Attaveqaatitsinnut pissusissamisuunngitsumik isertoqarnersoq taakkunanngaanniilluunniit anisoqarnersoq taamaalillutik nakkutigeqqissaarsinnaavaat, Digitalimik Sullissinermut Aqutsisoqarfiup pisortaa Katrine Hjelholt Nathanielsen oqarpoq.
Center For Cybersikkerhedili e-mailinik allagaatinillu atuaasinnaanngitsoq, taassuma erseqqissaatigaa. Namminersorlutik Oqartussalli attaveqaataannik pissusissamisuunngitsumik atuisoqarsorigaangamikku kalerriisarput.
