Villy: Kinamiut akissarsiaannut Danmark akuliutissanngilaq
- Naamik akuleruffigissanngilarput tamanna qanoq annertigissanersoq kalaallit nammineq oqallisigissavaat, nunanut allanut ministeri oqarpoq.
- Nunat tamat isumaqatigiissutaat, soorlu FN-imi isumaqatigiissutit Kalaallit Nunaata maleruarpagit danskit naalakkersuisuisa ajornartorsiutigisussaanngilaat, Kalaallit Nunaata nunat allamiut atorfinitsinneqarnerini atugassarititaasut akissarsiallu annikinnerusut akuersissutigissappagit, Villy Søvndal oqarpoq.
Taannarpiaq isumaqatiginagu danskit Folketinge-mi ilaasortaatitaat sulisartullu kattuffii arlaqartut qaamatini kingullerni qisuariarput.
Nunat allamiut akissarsiakitsillugit sulisinneqarnerat akiorniarlugu inatsimmik Danmark atuutitsilersinnaagaluartoq, nunanut allanut ministerip tikkuarpaa.
- Taatsiarlara, nunat allamiunik Danmark-imi sulisartoqarmat. Taakkuali pillugit inatsiseqanngilagut. Ulorianartorlugu tassaavoq, nunani allaneersunik sulisoqalersinaammat, akissarsiakitsunik, akileraarutinut akilersuisuunngitsunik, sullivimmi isumannaallisagaanngitsumi sulillutik akissarsikillutillu sulisunut maanimiunut unammillertunik, Villy Søvndal oqarpoq.
- Taamaattumillu aaqqissuussinermik taamattumik nassaarniartoqarneranut tapersersuivugut, Søvndal oqarpoq.
Sulianut annertuunut inatsit maannakkutut isikkoqarluni, danskit nunanut allanut inatsisaannut maannakkut atuuttumut naapertuutinngilaq, inatsimmi tassani allasimavoq - sulisinnaanermut akuersissut taamaallaat tunniunneqarsinnaavoq nalinginnaasumik sulinermi piumasaqaataasut malinneqartillugit.
Taamaattumik sulianut annertuunut inatsit piviusunngortinneqassappat, inatsit immikkut ittoq Folketinge-mi aalajangiiffigineqartussaavoq Villy Søvndal oqarpoq, taannalu aperaarput, inatsit taanna pillugu Danmark aalajangiisussanngortinneqarpat Danmark-imit akuerineqassanersoq ?
- Danmark-imi inatsinut tunngasut suli folketing-imut apuunneqanngitsoq suliarisinnaanngilara, tamanna Kalaallit Nunaanni oqallinnermi inernilerneqartussaavoq, tassaangaaniillu danskit inatsisaannut kinguneqassanersoq takujumaarparput, nunanut allanut ministeri Villy Søvndal oqarpoq.
Villy Søvndal-ip Kuupik V. Kleist-illu Ilimmarfimmi oqalugiarnerat KNR radio-mi unnugu nalunaaqutaq arfineq marluk qaangerlugu tanneq pingasunut tusarnaarneqarsinnaavoq.
