Inuusuttut nunat tamalaanut tunngasunik ilisimasaqarnerulersikkusuppaat
Pikkorissarnermi inuusuttut 13-it ilaatigut inuit pisinnaatitaaffii, nunat inoqqaavisa pisinnaatitaaffii issittumilu avatangiisinik nungusaataanngitsumik atuineq sammissavaat.
Issittumi nunat inuisalu naalakkersuinikkut ineriartornerat nunallu tamalaat akornanni pissutsinut akuunerujartorneq oqaluttuarisaanersiortumik ilanngullugit sammineqassapput.
Pikkorissarnermi Norgemi Saamit Inatsisartuisa nunanut tamalaanut New Yorkimi aallartitaa inatsisileritoorlu John B. Henriksen nunatsinnilu Meeqqat Illersuisuat Aviâja Egede Lynge ilinniartitsissapput. KNAPK, Pinngortitaleriffik Sulisitsisullu Kattuffiat aamma suliaminnik paasissutissiissapput.
- Anguniagarput tassaavoq inuusuttavut suliatsinnik minnerunngitsumillu nunanut tamalaanut tunngasunik ilisimasaqarnerulernissaat, taamalillutillu siunissami sulianik taamaattunik nangitsisussatut soqutiginninnerulernissaat, Hjalmar Dahl Inuit Issittormiut iunnersuisoqatigiiffiata nunatsinni siulittaasua, pikkorissaanissamillu isumassarsisuusoq oqarpoq.
Pikkorissarneq tuluttut ingerlanneqartoq aappaagu upernaap ingerlanerani Finlandimi Saamit nunaanni illoqarfimmi Inarimi nanginneqassasoq pilersaarutaavoq.