Video: Avataarsuata ujararigunagaata nakkarnera Nuummi takuneqarsinnaasoq
Arsarnerit avataarsuullu ujaraata Akiata eqqaani qilak qarsummagu qaammaallannerujussuaq immiussami alutornarluinnartumi takussaapput.
Immiussamik nassiussisup, Malik Hansenip, avataarsuup ujaraata nalunaaqutaq 18.56 nakkarnera takusimanngilaa.
Malik Hansenilli qarasaasialerinermik suliffeqarfik piginneqataaffigisaa Nukik-IT Tuapannguaniit avannaata kitaanut tassa Akianut sammisumik videomik immiussissuteqarpoq. Videomik immiussissut taanna aalasoqaraangat isumaminik immiussisartussanngorlugu aaqqitaavoq.
Danmarkimi Kalaallit Nunaannilu ujarassiuut misissuivianeersut - tassa GEUS-imeersut - immiussaq isiginnaareermassuk eqqoriarpaat takusartik ullorissap anarigaa.
GEUS-ip nunap sajunneranik uuttuisarfia nalunaarsugaqarsimanngitsoq
- Isumaqaavippunga avataarsuup ujaraata nakkarneranut assingusoq, nunap sajunneranik uuttuinermik immikkut ilisimasalik GEUS-imeersoq Trine Dahl Jensen oqarpoq.
GEUS-i nunap sajunneranik Nuummi uuttuisarfeqarpoq. Ullorissat anai nipitut sukkatigalutik silaannaq kigaallassatsillugu silaannarmit nakkaraangata GEUS-ip uuttuisarfianit ilaannikkut immiunneqartarput.
AAMMA ATUARUK Nuummi takuneqartoq allaanngivippoq ullorissap anaa
Trine Dahl Jensenilli nunap sajunneranik uuttuisarfiup ullorissap anaata nakkarnerani nalunaarsuisimaneranik takusaqarsinnaanngilaq.
Taamaammat avataarsuata ujaraanik takunnissorisimasut nittartakkamut ildkugle.dk-mut nalunaaruteqarnissaannut kajumissaarpai. Takusimasatimmi nittartakkami tassani nalunaarutigisinnaavaat.
Nalunaarutigisimasaat tuluit nittartagaannut nunani tamalaani takusanik nalunaaruteqartarfiusumut ingerlateqqinneqartarput.
